రాష్ట్రంలో నీటిపారుదల ప్రాజెక్టుల పురోగతిపై ముఖ్యమంత్రి సమగ్ర సమీక్ష నిర్వహించారు. ముఖ్యంగా పోలవరం ప్రాజెక్ట్, వెలిగొండ ప్రాజెక్ట్, హంద్రీనీవా సుజల స్రవంతి, పోలవరం–నలమల్ల సాగర్ లింక్, చింతలపూడి ఎత్తిపోతల పథకం, వరికపూడిశెల, ఉత్తరాంధ్ర ప్రాంతంలోని పలు ప్రాజెక్టుల పనులపై అధికారులతో విస్తృతంగా చర్చించారు.
ఈ సమావేశంలో ప్రతి ప్రాజెక్టు ప్రస్తుత స్థితి, ఎదురవుతున్న సవాళ్లు, నిధుల వినియోగం, పనుల వేగం వంటి అంశాలను సీఎం సమగ్రంగా పరిశీలించారు. రాష్ట్ర అభివృద్ధిలో నీటిపారుదల ప్రాజెక్టులు కీలక పాత్ర పోషిస్తున్నాయని ఆయన స్పష్టం చేశారు. ముఖ్యంగా వ్యవసాయం ఆధారంగా జీవించే రైతులకు ఈ ప్రాజెక్టులు జీవనాధారమని పేర్కొన్నారు.
భూగర్భజలాల స్థాయి పెంపుపై కూడా సీఎం ప్రత్యేక దృష్టి సారించారు. ఈ సందర్భంగా “జల ధార”, “జల హారతి” వంటి కార్యక్రమాల అమలు పురోగతిని అధికారులు వివరించారు. వర్షపు నీటిని సక్రమంగా నిల్వ చేయడం, చెరువులు, కాలువలను పునరుద్ధరించడం ద్వారా భూగర్భజలాలను పెంచే చర్యలను మరింత వేగవంతం చేయాలని సీఎం సూచించారు.
ఇక ఈసీఆర్ఎఫ్ డ్యామ్కు సంబంధించిన గ్యాప్ 1, గ్యాప్ 2 పనులపై సీఎం ప్రత్యేకంగా దృష్టి సారించారు. ఈ పనులను వచ్చే ఏడాది మార్చి నెలలోగా పూర్తి చేయాలని ఆయన స్పష్టమైన ఆదేశాలు జారీ చేశారు. పనుల్లో ఎలాంటి ఆలస్యం జరగకుండా అధికారులు క్రమం తప్పకుండా పర్యవేక్షణ చేయాలని సూచించారు.
పోలవరం ప్రాజెక్టు వంటి భారీ ప్రాజెక్టుల పూర్తి ద్వారా రాష్ట్రానికి దీర్ఘకాలిక ప్రయోజనాలు లభిస్తాయని సీఎం అభిప్రాయపడ్డారు. సాగునీటి విస్తీర్ణం పెరగడంతో పాటు తాగునీటి సమస్యలు కూడా పరిష్కారమవుతాయని ఆయన పేర్కొన్నారు. అలాగే వరద నియంత్రణలో కూడా ఈ ప్రాజెక్టులు కీలక పాత్ర పోషిస్తాయని వివరించారు.
ఇప్పటివరకు పోలవరం ప్రాజెక్టు నిర్మాణానికి రూ.27,089 కోట్లు వ్యయం అయినట్టు వెల్లడి.
మరో రూ.5,108 కోట్లతో సివిల్, ఆర్ అండ్ ఆర్ పనులు పూర్తి చేయాలని సీఎం ఆదేశాలు జారీ చేశారు.
మొత్తం వెలిగొండ పనులు జూన్ నాటికి పూర్తి చేయాలని లక్ష్యం, దీనికి రూ.2,042 కోట్లు వ్యయం కానుందని అంచనా వేస్తున్నట్లు వెల్లడించారు.
