ఆంధ్రప్రదేశ్ రాష్ట్ర రాజధాని అంశంపై ఎంతోకాలంగా కొనసాగుతున్న చర్చలకు ముగింపు పలికే విధంగా కీలక పరిణామం చోటుచేసుకుంది. ఆంధ్రప్రదేశ్ పునర్వ్యవస్థీకరణ (సవరణ) చట్టం, 2026 ద్వారా 2014 నాటి ప్రధాన చట్టంలోని సెక్షన్ 5ను సవరించి అమరావతిని రాష్ట్ర నూతన రాజధానిగా అధికారికంగా ఖరారు చేశారు.ఈ సవరణ చట్టం ప్రకారం, అమరావతి ఇప్పుడు ఆంధ్రప్రదేశ్ యొక్క ఏకైక అధికారిక రాజధానిగా గుర్తింపు పొందింది. ఈ నిర్ణయం రాష్ట్ర రాజకీయాల్లోనే కాకుండా పరిపాలన, అభివృద్ధి దిశలో కూడా ఒక ముఖ్యమైన మైలురాయిగా భావిస్తున్నారు. ఈ చట్టం జూన్ 2, 2024 నుంచి అమలులోకి వచ్చినట్లుగా పరిగణించబడుతుందని స్పష్టంగా పేర్కొన్నారు.
ఈ చట్టంలో ‘అమరావతి’ అనే పదానికి స్పష్టమైన నిర్వచనం ఇచ్చారు. APCRDA చట్టం, 2014 కింద నోటిఫై చేయబడిన రాజధాని నగర ప్రాంతాలన్నింటినీ అమరావతి పరిధిగా పరిగణించనున్నట్లు పేర్కొన్నారు. దీని వల్ల రాజధాని పరిధి, పరిపాలనా హద్దులపై ఉన్న అనిశ్చితి తొలగిపోయింది.
ఈ సవరణ చట్టానికి భారత రాష్ట్రపతి ఏప్రిల్ 6, 2026న ఆమోదం తెలిపారు. అనంతరం భారత ప్రభుత్వం గెజిట్ ద్వారా ఈ చట్టాన్ని అధికారికంగా ప్రకటించింది. గెజిట్ ప్రకటనతో ఈ చట్టం అమలులోకి వచ్చినట్లు అధికారికంగా పరిగణిస్తున్నారు.ఈ నిర్ణయం రాష్ట్రంలో పెట్టుబడులు, మౌలిక వసతుల అభివృద్ధికి ఊతమిస్తుందని నిపుణులు అభిప్రాయపడుతున్నారు. అమరావతిలో ఇప్పటికే ప్రారంభమైన నిర్మాణ పనులు, ప్రభుత్వ కార్యాలయాల ఏర్పాట్లు మరింత వేగవంతం కావచ్చని భావిస్తున్నారు. అంతేకాకుండా, రియల్ ఎస్టేట్ రంగం, వ్యాపార కార్యకలాపాలు కూడా ఊపందుకునే అవకాశం ఉంది.రాజధాని అంశంపై గతంలో జరిగిన వివాదాలు, అనిశ్చితి వల్ల అభివృద్ధి కార్యక్రమాలు ఆలస్యమయ్యాయి. అయితే తాజా సవరణ చట్టంతో ఆ సందిగ్ధతకు తెరపడింది. ప్రభుత్వం తీసుకున్న ఈ నిర్ణయం ద్వారా పరిపాలనా వ్యవస్థలో స్థిరత్వం వస్తుందని భావిస్తున్నారు.
