దేశ అభివృద్ధికి ఇంధనంగా నిలిచే బొగ్గు రంగం నవభారత నిర్మాణంలో అత్యంత కీలకమైన పాత్ర పోషిస్తోందని కేంద్ర బొగ్గు, గనుల శాఖ మంత్రి కిషన్ రెడ్డి స్పష్టం చేశారు. దేశ ఆర్థిక వ్యవస్థ బలోపేతం, పారిశ్రామికాభివృద్ధి, విద్యుత్ ఉత్పత్తి రంగాల పురోగతిలో బొగ్గు పరిశ్రమకు ప్రత్యేక స్థానం ఉందని పేర్కొన్నారు. గతంలో అవినీతి ఆరోపణలు, కుంభకోణాలతో వార్తల్లో నిలిచిన ఈ రంగాన్ని ఎన్డీయే ప్రభుత్వం పారదర్శకత, సాంకేతికత, సమర్థ పాలనతో కొత్త దిశగా తీసుకెళ్లిందని ఆయన అన్నారు.
హైదరాబాద్లోని ఫిల్మ్నగర్ కల్చరల్ సెంటర్లో నిర్వహించిన మీడియా సమావేశంలో మాట్లాడిన కిషన్ రెడ్డి, కాంగ్రెస్ పార్టీతో పాటు గత యూపీఏ ప్రభుత్వంపై తీవ్ర విమర్శలు గుప్పించారు. కాంగ్రెస్ పాలనలో బొగ్గు రంగం అవినీతికి, అక్రమాలకు, అనిశ్చితికి ప్రతీకగా మారిందని ఆరోపించారు.
యూపీఏ ప్రభుత్వ పాలనలో బొగ్గు గనుల కేటాయింపులు తీవ్ర వివాదాలకు దారితీశాయని కిషన్ రెడ్డి గుర్తు చేశారు. ఆ కాలంలో బొగ్గు రంగం అభివృద్ధి కంటే రాజకీయ, ఆర్థిక ప్రయోజనాల కోసం ఉపయోగించబడిందని విమర్శించారు.“ఒకప్పుడు బొగ్గు అంటే దేశ అభివృద్ధికి అవసరమైన వనరుగా కాకుండా కుంభకోణాలకు కేరాఫ్ అడ్రస్గా ప్రజలు భావించే పరిస్థితి ఏర్పడింది” అని వ్యాఖ్యానించారు. దేశ ప్రజల సంపదను కొందరి ప్రయోజనాల కోసం వినియోగించే విధంగా వ్యవస్థ పనిచేసిందని ఆరోపించారు.
యూపీఏ ప్రభుత్వ హయాంలో వెలుగులోకి వచ్చిన బొగ్గు గనుల కేటాయింపుల వ్యవహారాన్ని ప్రస్తావిస్తూ కిషన్ రెడ్డి తీవ్ర వ్యాఖ్యలు చేశారు. అప్పట్లో భారత నియంత్రణ మరియు లెక్కల పరిశీలక సంస్థ (కాగ్) చేసిన ఆడిట్లో రూ.1.86 లక్షల కోట్ల మేర నష్టాన్ని కలిగించిన భారీ బొగ్గు కుంభకోణం బయటపడిందని గుర్తుచేశారు.ఈ వ్యవహారం దేశవ్యాప్తంగా రాజకీయ దుమారానికి కారణమైందని, ప్రభుత్వ విధానాలపై తీవ్ర ప్రశ్నలు తలెత్తాయని చెప్పారు. ప్రజల ఆస్తులను పారదర్శకత లేకుండా కేటాయించడం వల్ల దేశానికి భారీ నష్టం వాటిల్లిందని ఆరోపించారు.
యూపీఏ ప్రభుత్వంలో బొగ్గు శాఖకు సంబంధించిన వ్యవహారాల్లో పనిచేసిన ఒక మాజీ మంత్రి జైలుకు కూడా వెళ్లాల్సి వచ్చిందని కిషన్ రెడ్డి పేర్కొన్నారు. బొగ్గు రంగంలో చోటుచేసుకున్న అవకతవకలు ఎంత తీవ్రంగా ఉన్నాయో ఈ సంఘటనలు నిరూపిస్తున్నాయని అన్నారు.అవినీతి ఆరోపణలు, దర్యాప్తులు, కోర్టు కేసులతో ఆ కాలంలో బొగ్గు రంగం ప్రతిష్ఠ దెబ్బతిందని విమర్శించారు. ప్రజల విశ్వాసాన్ని కోల్పోయిన వ్యవస్థను తిరిగి గాడిలో పెట్టడం ఎన్డీయే ప్రభుత్వానికి పెద్ద సవాల్గా మారిందన్నారు.
బొగ్గు గనుల కేటాయింపుల వ్యవహారంలో సుప్రీంకోర్టు కీలక నిర్ణయం తీసుకున్న విషయాన్ని కూడా కిషన్ రెడ్డి ప్రస్తావించారు. యూపీఏ ప్రభుత్వం కేటాయించిన బొగ్గు గనుల కేటాయింపులను సుప్రీంకోర్టు రద్దు చేయడం దేశ చరిత్రలో ఒక ముఖ్యమైన మలుపుగా నిలిచిందన్నారు.ఆ తీర్పు ద్వారా సహజ వనరుల కేటాయింపులో పారదర్శకత ఎంత ముఖ్యమో దేశానికి తెలిసిందని పేర్కొన్నారు. తదనంతరం కేంద్ర ప్రభుత్వం కొత్త విధానాలతో గనుల కేటాయింపులను నిర్వహించే వ్యవస్థను రూపొందించిందని వివరించారు.
గత 12 ఏళ్లుగా ఎన్డీయే ప్రభుత్వం బొగ్గు రంగంలో అనేక సంస్కరణలు చేపట్టిందని కిషన్ రెడ్డి తెలిపారు. గనుల కేటాయింపులో పారదర్శక వేలం విధానాన్ని ప్రవేశపెట్టడంతో పాటు సాంకేతికత ఆధారిత పర్యవేక్షణ వ్యవస్థలను అమలు చేసినట్లు చెప్పారు.దీంతో అవినీతికి అవకాశాలు తగ్గడమే కాకుండా ఉత్పత్తి సామర్థ్యం కూడా పెరిగిందన్నారు. దేశ ఇంధన భద్రతను దృష్టిలో ఉంచుకుని బొగ్గు ఉత్పత్తి పెంపుపై ప్రత్యేక దృష్టి సారించినట్లు పేర్కొన్నారు.
