తెలంగాణ రాజకీయాల్లో మరోసారి మాటల యుద్ధం వేడెక్కింది. మహారాష్ట్ర ముఖ్యమంత్రి దేవేంద్ర ఫడ్నవీస్ను కలిసేందుకు ప్రయత్నించానంటూ తెలంగాణ ముఖ్యమంత్రి రేవంత్ రెడ్డి చేసిన వ్యాఖ్యలు పూర్తిగా అసత్యమని భారతీయ జనతా పార్టీ తెలంగాణ రాష్ట్ర అధ్యక్షుడు N. రాంచంద్రరావు తీవ్రంగా ఆరోపించారు. రాజ్యాంగబద్ధమైన పదవిలో ఉన్న ముఖ్యమంత్రి ప్రజలకు వాస్తవాలు చెప్పాల్సిన బాధ్యత కలిగి ఉండగా, రాజకీయ ప్రయోజనాల కోసం తప్పుడు ప్రచారాలకు పాల్పడడం విచారకరమని ఆయన విమర్శించారు.
హైదరాబాద్లో నిర్వహించిన మీడియా సమావేశంలో మాట్లాడిన రాంచందర్ రావు, మహారాష్ట్ర ముఖ్యమంత్రి దేవేందర్ పడ్నవిస్ తో భేటీకి సంబంధించి రేవంత్ రెడ్డి చేసిన వ్యాఖ్యలపై స్పందించారు. ఈ వ్యవహారంలో వాస్తవాలను ప్రజల ముందుంచాల్సిన అవసరం ఉందని పేర్కొంటూ పలు ప్రశ్నలు లేవనెత్తారు.
రాంచందర్ రావు తెలిపిన వివరాల ప్రకారం, రేవంత్ రెడ్డి మహారాష్ట్ర ముఖ్యమంత్రిని కలవడానికి ప్రయత్నించానని ఇటీవల పేర్కొన్నారని, అయితే అలాంటి ఎలాంటి అపాయింట్మెంట్ అభ్యర్థన తమ వద్దకు రాలేదని ఫడ్నవీస్ కార్యాలయం స్పష్టం చేసిందని ఆయన అన్నారు. ముఖ్యమంత్రి చేసిన ప్రకటనలకు, అధికారికంగా అందుబాటులో ఉన్న సమాచారానికి పొంతన లేదని ఆరోపించారు.ఈ అంశంలో రాజకీయ లబ్ధి కోసం ప్రజలను తప్పుదోవ పట్టించే ప్రయత్నం జరుగుతోందని ఆయన విమర్శించారు. ప్రజలు నిజానిజాలు తెలుసుకోవాల్సిన అవసరం ఉందని పేర్కొన్నారు.
ఈ సందర్భంగా రాంచందర్ రావు మరో అంశాన్ని కూడా ప్రస్తావించారు. సుమారు నెల రోజుల క్రితం తెలంగాణ ప్రభుత్వంలోని ఒక మంత్రి, మహారాష్ట్ర ముఖ్యమంత్రితో భేటీకి అపాయింట్మెంట్ కోరిన విషయం నిజమేనని, అయితే అది ముఖ్యమంత్రి స్థాయిలో కాదని చెప్పారు.
ఆ మంత్రి ఎవరో ప్రజలకు తెలిసిన విషయమేనని పేర్కొంటూ, ఇప్పుడు ముఖ్యమంత్రి స్వయంగా అపాయింట్మెంట్ కోరానని చెప్పడం రాజకీయంగా సరైన విధానం కాదన్నారు. అధికారిక రికార్డుల్లో లేని విషయాలను ప్రజల ముందు చెప్పడం వల్ల ప్రభుత్వ విశ్వసనీయత దెబ్బతింటుందని వ్యాఖ్యానించారు.
రాజ్యాంగబద్ధమైన పదవిలో ఉన్న వ్యక్తులు చేసే ప్రతి ప్రకటనకు విలువ ఉంటుందని రాంచందర్ రావు అన్నారు. ముఖ్యంగా ముఖ్యమంత్రి వంటి అత్యున్నత పదవిలో ఉన్న నాయకులు వాస్తవాల ఆధారంగా మాట్లాడాలని, రాజకీయ ఆరోపణలు చేసినా నిజనిర్ధారణతో ముందుకు రావాలని సూచించారు. ప్రజలకు సరైన సమాచారం అందించడం ప్రభుత్వ ప్రధాన బాధ్యత అని, రాజకీయ విభేదాలు ఉన్నప్పటికీ అసత్య ప్రచారాలకు చోటు ఉండకూడదని పేర్కొన్నారు. ప్రజాస్వామ్యంలో పారదర్శకత, బాధ్యతాయుత రాజకీయాలు అత్యంత అవసరమని చెప్పారు.
ఇటీవల తెలంగాణలో అధికార కాంగ్రెస్ పార్టీ, బీజేపీ మధ్య రాజకీయ విమర్శలు మరింత తీవ్రతరమవుతున్నాయి. రాష్ట్ర ప్రభుత్వ నిర్ణయాలు, కేంద్ర ప్రభుత్వ విధానాలు, అభివృద్ధి కార్యక్రమాలు, నిధుల కేటాయింపులు వంటి అంశాలపై ఇరు పార్టీల నేతలు తరచూ పరస్పర విమర్శలు చేసుకుంటున్నారు. డ్నవీస్ భేటీ అంశం కూడా ఇప్పుడు అదే రాజకీయ వాగ్వాదంలో భాగంగా మారింది. కాంగ్రెస్ నాయకత్వం ఒకవైపు తమ వైఖరిని సమర్థించుకుంటుండగా, బీజేపీ మాత్రం ముఖ్యమంత్రి చేసిన వ్యాఖ్యల్లో వాస్తవం లేదని వాదిస్తోంది.
