- హైదరాబాద్లో 12 మంది నకిలీ డాక్టర్ల గుర్తింపు
- నకిలీ వైద్యులకు సజ్జనార్ తీవ్ర హెచ్చరిక
- క్లినిక్కు వెళ్లే ముందు జాగ్రత్త.. అనుమానం ఉంటే 112కు ఫోన్ చేయండి
వైద్యం పేరుతో అమాయక ప్రజల ప్రాణాలతో చెలగాటమాడుతున్న నకిలీ వైద్యులపై హైదరాబాద్ నగర పోలీసులు కఠిన చర్యలకు శ్రీకారం చుట్టారు. సరైన వైద్య విద్యార్హతలు, అనుమతులు లేకుండానే క్లినిక్లు నిర్వహిస్తూ ప్రజలకు చికిత్స అందిస్తున్న వారిపై ప్రత్యేక నిఘా ఏర్పాటు చేసినట్లు హైదరాబాద్ పోలీస్ కమిషనర్ వీసీ సజ్జనార్ తెలిపారు. ఈ నిఘా చర్యల్లో ఇప్పటివరకు 12 మంది నకిలీ వైద్యులను గుర్తించి చట్టపరమైన చర్యలు తీసుకున్నట్లు ఆయన వెల్లడించారు. ప్రజారోగ్య పరిరక్షణలో భాగంగా నకిలీ వైద్యులపై చర్యలు మరింత కొనసాగుతాయని స్పష్టం చేశారు.
కనీస వైద్య పరిజ్ఞానం కూడా లేకపోయినా కొందరు వ్యక్తులు తాము డాక్టర్లమంటూ చలామణి అవుతున్నారని సజ్జనార్ ఆందోళన వ్యక్తం చేశారు. రోగుల ఆరోగ్య పరిస్థితిని సరిగ్గా అంచనా వేయకుండా యాంటీబయాటిక్స్, స్టెరాయిడ్లు, బీపీ, మధుమేహం మందులను విచక్షణారహితంగా ఇవ్వడం, ఇంజక్షన్లు, సెలైన్లు ఎక్కించడం వంటి చర్యలకు పాల్పడుతున్నారని తెలిపారు. శాస్త్రీయ వైద్య పరిజ్ఞానం లేకుండా ఇలాంటి చికిత్సలు చేయడం వల్ల రోగుల ఆరోగ్యం మరింత విషమించే ప్రమాదం ఉందని హెచ్చరించారు. ముఖ్యంగా సరైన నిర్ధారణ లేకుండా మందులు, ఇంజక్షన్లు వాడటం వల్ల ఊపిరితిత్తులు, గుండె, మూత్రపిండాలపై తీవ్ర ప్రభావం పడే అవకాశం ఉందని పేర్కొన్నారు.
నకిలీ వైద్యుల వల్ల కలిగే ప్రమాదాలను దృష్టిలో ఉంచుకుని ప్రజలు వైద్యుడి అర్హతలను ముందుగానే నిర్ధారించుకోవాలని పోలీసులు సూచించారు. క్లినిక్ లేదా ఆసుపత్రి రిసెప్షన్ వద్ద జిల్లా వైద్య, ఆరోగ్య అధికారి (DMHO) జారీ చేసిన అధికారిక రిజిస్ట్రేషన్ సర్టిఫికెట్ ఉందో లేదో పరిశీలించాలని సజ్జనార్ తెలిపారు. అలాగే వైద్యుడి పేరు, విద్యార్హతలు, తెలంగాణ స్టేట్ మెడికల్ కౌన్సిల్ (TSMC) రిజిస్ట్రేషన్ నంబర్ వంటి వివరాలు ప్రదర్శిస్తున్నారా లేదా చూడాలని సూచించారు.
అర్హతలను ఆన్లైన్లో కూడా పరిశీలించవచ్చని పోలీసులు సూచించారు. తెలంగాణ స్టేట్ మెడికల్ కౌన్సిల్కు సంబంధించిన డాక్టర్ సెర్చ్ సదుపాయంలో వైద్యుడి పేరు లేదా రిజిస్ట్రేషన్ నంబర్ ద్వారా వివరాలను తనిఖీ చేయవచ్చని తెలిపారు. అధికారిక రికార్డుల్లో వివరాలు కనిపించకపోతే ఆ వైద్యుడి అర్హతలపై అనుమానం కలిగే అవకాశం ఉందని, అలాంటి సందర్భాల్లో అప్రమత్తంగా ఉండాలని సూచించారు. చికిత్స విషయంలో సందేహం ఉన్నవారు మరో అర్హత కలిగిన వైద్యుడి వద్ద సెకండ్ ఒపీనియన్ తీసుకోవడం మంచిదని సజ్జనార్ సూచించారు.
ఇటీవల నగరంలోని పలు ప్రాంతాల్లో నిర్వహించిన తనిఖీలు, దాడుల్లో సరైన అర్హతలు లేకుండా క్లినిక్లు నిర్వహిస్తున్న వ్యక్తులపై పోలీసులు చర్యలు చేపట్టారు. కొన్ని చోట్ల నకిలీ ధ్రువపత్రాలు, మందులు, ఇంజక్షన్లు, సెలైన్ బాటిళ్లు, వైద్య పరికరాలు వంటి సామగ్రి కూడా స్వాధీనం చేసుకున్నట్లు అధికారులు వెల్లడించారు. ఈ నేపథ్యంలో కేవలం క్లినిక్ ఉందనే కారణంతో అక్కడ చికిత్స అందించే వ్యక్తిని అర్హత కలిగిన వైద్యుడిగా భావించవద్దని పోలీసులు సూచిస్తున్నారు. వైద్య సేవలు పొందే ముందు సంబంధిత వైద్యుడి అర్హత, రిజిస్ట్రేషన్, క్లినిక్ అనుమతులను పరిశీలించడం ద్వారా మోసపూరిత చికిత్సకు దూరంగా ఉండవచ్చని అధికారులు చెబుతున్నారు.
నకిలీ వైద్యుల విషయంలో ప్రజలు చూపే అప్రమత్తత కూడా పోలీసుల చర్యలకు తోడ్పడుతుందని అధికారులు చెబుతున్నారు. అనుమతి లేని క్లినిక్లు, అర్హత లేని వ్యక్తులు వైద్యం చేస్తున్నట్లు గుర్తిస్తే సమీప పోలీస్ స్టేషన్కు సమాచారం ఇవ్వాలని లేదా అత్యవసర సహాయం కోసం 112కు ఫోన్ చేయాలని సజ్జనార్ కోరారు. ఫిర్యాదు చేసే సమయంలో క్లినిక్ పేరు, ప్రాంతం, వైద్యుడి పేరు వంటి వివరాలు అందుబాటులో ఉంటే దర్యాప్తుకు మరింత ఉపయోగపడతాయని పోలీసులు సూచిస్తున్నారు. ప్రజల నుంచి వచ్చే సమాచారాన్ని ఆధారంగా చేసుకుని మరిన్ని తనిఖీలు నిర్వహించే అవకాశం ఉంది.
నగరంలో నకిలీ వైద్యులపై ప్రత్యేక నిఘా కొనసాగుతుందని హైదరాబాద్ పోలీస్ కమిషనర్ స్పష్టం చేశారు. అర్హతలు లేకుండా వైద్యం చేయడం కేవలం నిబంధనల ఉల్లంఘన మాత్రమే కాకుండా రోగుల ప్రాణాలకు తీవ్రమైన ముప్పు కలిగించే అంశమని పోలీసులు హెచ్చరిస్తున్నారు. ముఖ్యంగా దీర్ఘకాలిక వ్యాధులతో బాధపడేవారు మందుల విషయంలో మరింత జాగ్రత్తగా ఉండాలని, ఇతరుల సూచనలపై కాకుండా అర్హత కలిగిన వైద్యుల సలహాతోనే చికిత్స తీసుకోవాలని సూచిస్తున్నారు. ప్రజలు అప్రమత్తంగా ఉండటం, వైద్యుల అర్హతలను తనిఖీ చేయడం, అనుమానాస్పద క్లినిక్ల సమాచారాన్ని అధికారులకు అందించడం ద్వారా నకిలీ వైద్యుల ముప్పును తగ్గించవచ్చని అధికారులు చెబుతున్నారు.
