ప్రపంచ చరిత్రలో అత్యంత విషాదకరమైన సముద్ర ప్రమాదాల్లో ఒకటిగా గుర్తింపు పొందిన టైటానిక్ నౌక మునకకు 114 ఏళ్లు గడిచిపోయినా.. ఆ ఘటనకు సంబంధించిన జ్ఞాపకాలు, అరుదైన వస్తువులు ఇప్పటికీ ప్రపంచవ్యాప్తంగా ప్రజలను ఆకర్షిస్తూనే ఉన్నాయి. టైటానిక్ ప్రమాదం చుట్టూ ఎన్నో కథలు, పరిశోధనలు, పుస్తకాలు, సినిమాలు వచ్చినప్పటికీ.. ఆ మహా విషాదానికి సంబంధించిన అసలు వస్తువులు బయటపడిన ప్రతిసారీ చరిత్రపై ఆసక్తి మరోసారి పెరుగుతోంది. తాజాగా టైటానిక్ ప్రమాదం నుంచి ప్రాణాలతో బయటపడిన ఓ ప్రయాణికురాలు ఉపయోగించిన లైఫ్ జాకెట్ వేలంలో రికార్డు స్థాయిలో ధర పలకడం ప్రపంచవ్యాప్తంగా చర్చనీయాంశంగా మారింది.
1912లో అట్లాంటిక్ మహాసముద్రంలో మునిగిపోయిన టైటానిక్ నౌకలో ప్రయాణించిన 22 ఏళ్ల లారా మాబెల్ ఫ్రాంకటెల్లీ ధరించిన లైఫ్ జాకెట్ను తాజాగా బ్రిటన్లోని ప్రముఖ వేలం సంస్థ హెన్రీ ఆల్డ్రిడ్జ్ అండ్ సన్ వేలం వేసింది. ఈ అరుదైన చారిత్రక వస్తువును ఓ వ్యక్తి ఫోన్ ద్వారా బిడ్ చేసి సొంతం చేసుకున్నట్లు వేలం నిర్వాహకులు వెల్లడించారు. ఈ లైఫ్ జాకెట్ ఏకంగా 6.70 లక్షల పౌండ్లకు, అంటే భారత కరెన్సీలో సుమారు రూ.10 కోట్లకు పైగా అమ్ముడైంది.
వేలానికి ముందు ఈ లైఫ్ జాకెట్కు భారీ ధర లభిస్తుందని అంచనా వేసినప్పటికీ.. తుది ధర మాత్రం అందరి అంచనాలను మించిపోయింది. వేలం సంస్థ దీని విలువను సుమారు 2.5 లక్షల నుంచి 3.5 లక్షల పౌండ్ల మధ్య ఉంటుందని అంచనా వేసింది. అయితే వేలం ప్రక్రియ ప్రారంభమైన తర్వాత చారిత్రక ప్రాధాన్యత కలిగిన ఈ వస్తువును దక్కించుకునేందుకు ఆసక్తి పెరగడంతో ధర వేగంగా పెరిగింది. చివరకు అంచనా ధర కంటే రెట్టింపుకుపైగా మొత్తం పలకడం విశేషంగా మారింది.
ఈ లైఫ్ జాకెట్ ప్రత్యేకత కేవలం అది టైటానిక్ నౌకకు సంబంధించినదనే అంశంలోనే లేదు. ఆ ప్రమాదం నుంచి ప్రాణాలతో బయటపడిన వ్యక్తి స్వయంగా ఉపయోగించిన వస్తువు కావడంతో దీనికి చారిత్రక విలువ మరింత పెరిగింది. టైటానిక్ నౌక మునిగిపోయిన సమయంలో అక్కడ చోటుచేసుకున్న భయానక పరిస్థితులను ఊహించుకునేందుకు ఈ లైఫ్ జాకెట్ ఒక ప్రత్యక్ష సాక్ష్యంలా నిలుస్తుందని చరిత్రాభిమానులు భావిస్తున్నారు.
క్రీమ్ రంగు కాన్వాస్తో తయారు చేసిన ఈ లైఫ్ జాకెట్లో 12 కార్క్ ఫ్లోటేషన్ ప్యాడ్లు ఉన్నాయి. అప్పటి కాలంలో సముద్ర ప్రయాణాల్లో ఉపయోగించే రక్షణ పరికరాల రూపకల్పనకు ఇది ఒక ఉదాహరణగా నిలుస్తోంది. ప్రస్తుతం అందుబాటులో ఉన్న ఆధునిక లైఫ్ జాకెట్లతో పోలిస్తే దీని నిర్మాణం, ఆకృతి పూర్తిగా భిన్నంగా ఉంటుంది. అయితే ఒక శతాబ్దానికి పైగా కాలం గడిచినప్పటికీ ఈ వస్తువు భద్రంగా ఉండటం కూడా ప్రత్యేకతగా చెప్పవచ్చు.
ఈ లైఫ్ జాకెట్కు మరో అరుదైన ప్రత్యేకత కూడా ఉంది. లారా ఫ్రాంకటెల్లీతో పాటు అదే లైఫ్బోట్లో ప్రాణాలతో బయటపడిన మరో ఏడుగురు ప్రయాణికుల సంతకాలు కూడా దీనిపై ఉన్నాయి. దీంతో ఇది కేవలం ఒక రక్షణ పరికరంగా కాకుండా.. టైటానిక్ ప్రమాదం నుంచి బయటపడిన పలువురు వ్యక్తుల జ్ఞాపకాలను మోస్తున్న చారిత్రక ఆధారంగా మారింది. ఆ ప్రమాదం నుంచి ప్రాణాలతో బయటపడిన వ్యక్తులు ఒకే లైఫ్బోట్లో ఉన్న సమయంలో వారి సంతకాలు ఈ వస్తువుపై నమోదవడం దీని విలువను మరింత పెంచినట్లు భావిస్తున్నారు.
1912 ఏప్రిల్లో టైటానిక్ నౌక తన తొలి ప్రయాణంలోనే మంచుకొండను ఢీకొని ఉత్తర అట్లాంటిక్ సముద్రంలో మునిగిపోయింది. అప్పట్లో ప్రపంచంలోనే అత్యంత విలాసవంతమైన, అత్యంత సురక్షితమైన నౌకల్లో ఒకటిగా భావించిన టైటానిక్ ఇంతటి విషాదానికి గురికావడం ప్రపంచాన్ని దిగ్భ్రాంతికి గురిచేసింది. ఈ ప్రమాదంలో సుమారు 1,500 మంది ప్రాణాలు కోల్పోయారు. కొంతమంది ప్రయాణికులు, సిబ్బంది మాత్రం లైఫ్బోట్ల సహాయంతో ప్రాణాలతో బయటపడ్డారు.
టైటానిక్ ప్రమాదం తర్వాత ఈ నౌకకు సంబంధించిన అనేక వస్తువులు ప్రపంచవ్యాప్తంగా సేకరణకర్తలు, చరిత్రాభిమానులు, మ్యూజియంల దృష్టిని ఆకర్షించాయి. ప్రయాణికుల వ్యక్తిగత వస్తువులు, నౌకకు సంబంధించిన పత్రాలు, ఫోటోలు, ఇతర జ్ఞాపికలు గతంలోనూ వేలం వేయబడ్డాయి. అయితే టైటానిక్ ప్రమాదం నుంచి ప్రాణాలతో బయటపడిన వ్యక్తి ఉపయోగించిన లైఫ్ జాకెట్ వేలానికి రావడం ఇదే తొలిసారి అని వేలం నిర్వాహకులు తెలిపారు. ఈ కారణంగానే దీనికి అంతటి భారీ ధర లభించినట్లు భావిస్తున్నారు.
