తెలంగాణ కాంగ్రెస్ పార్టీలో అంతర్గత విభేదాలు ఒక్కసారిగా తీవ్రరూపం దాల్చాయి. సొంత ప్రభుత్వం, పార్టీ అధిష్టానం లక్ష్యంగా మునుగోడు ఎమ్మెల్యే కోమటిరెడ్డి రాజగోపాల్ రెడ్డి చేసిన వ్యాఖ్యలు అధికార కాంగ్రెస్ వర్గాల్లో పెద్ద దుమారాన్నే రేపాయి. కాంగ్రెస్ పార్టీతో ఎలాంటి సంబంధం లేని వారు, ఆంధ్ర నాయకులకు మద్దతుగా నిలిచే వారు ఇవాళ రాష్ట్ర ప్రభుత్వంలో కీలక పదవులను అనుభవిస్తున్నారంటూ రాజగోపాల్ రెడ్డి చేసిన తీవ్ర వ్యాఖ్యలు పార్టీలో తీవ్ర కలకలం సృష్టించాయి. ప్రభుత్వంపై ఆయన చేసిన బహిరంగ విమర్శలు అధికార పక్షంలో పెద్ద చర్చకు దారితీశాయి.
కోమటిరెడ్డి రాజగోపాల్ రెడ్డి చేసిన ఈ సంచలన వ్యాఖ్యలపై తెలంగాణ ప్రదేశ్ కాంగ్రెస్ కమిటీ (టీపీసీసీ) అధ్యక్షుడు మహేశ్ కుమార్ గౌడ్ వెంటనే స్పందించారు. ప్రభుత్వం, పార్టీ నాయకత్వంపై రాజగోపాల్ రెడ్డి చేసిన వ్యాఖ్యలు తన దృష్టికి వచ్చాయని ఆయన పేర్కొన్నారు. పార్టీలో క్రమశిక్షణ అత్యంత కీలకమని, ఎవరు కూడా గీత దాటడానికి వీల్లేదని తేల్చి చెప్పారు. పార్టీ క్రమశిక్షణను ఉల్లంఘిస్తే ఎంతటి పెద్ద నేతనైనా సరే సహించే ప్రసక్తే లేదని చాలా తీవ్రమైన స్వరంతో హెచ్చరించారు. పార్టీ లక్ష్మణరేఖ దాటితే ముఖ్యమంత్రితో సహా అందరూ ఒక్కటేనని, రాజగోపాల్ రెడ్డి వ్యాఖ్యలను కాంగ్రెస్ అధిష్టానం దృష్టికి తీసుకెళ్లి తగిన చర్యలు తీసుకుంటామని ఆయన స్పష్టం చేశారు.
హైదరాబాద్లోని రవీంద్రభారతిలో ప్రముఖ కళాకారుడు ఏపూరి సోమన్న 25 ఏళ్ల పాటల ప్రస్థానం సందర్భంగా నిర్వహించిన పుస్తకావిష్కరణ సభలో పాల్గొన్న కోమటిరెడ్డి రాజగోపాల్ రెడ్డి ప్రభుత్వ తీరుపై తీవ్ర ఆగ్రహం వ్యక్తం చేశారు. గతంలో పాడిన “ఎవరి పాలైందిరో తెలంగాణ” అనే పాటలోని పరిస్థితులే నేడు స్వరాష్ట్రంలో మళ్లీ కనిపిస్తుండటం తీవ్ర బాధాకరమని అన్నారు. అధికారాన్ని అడ్డం పెట్టుకుని అభివృద్ధి పేరిట లక్షల కోట్లు దోచుకుంటున్నారని తీవ్రస్థాయిలో ధ్వజమెత్తారు. అలాంటి దోపిడీదారులకు వ్యతిరేకంగా పోరాడేందుకు తెలంగాణ ఉద్యమకారులు, కళాకారులు మళ్లీ గజ్జె కట్టి సిద్ధం కావాలని ఆయన పిలుపునిచ్చారు.
రాష్ట్రంలో తెచ్చిన లక్షల కోట్ల అప్పుల నిధులన్నీ ఆంధ్రా కాంట్రాక్టర్లకే దక్కుతున్నాయని రాజగోపాల్ రెడ్డి ఆరోపించారు. స్వరాష్ట్రంలో తెలంగాణ ఉద్యమకారులకు, పేదలకు సరైన న్యాయం జరగడం లేదని ఆవేదన వ్యక్తం చేశారు. పెద్ద పెద్ద కాంట్రాక్టర్లకు లక్షల కోట్లు కట్టబెడుతున్న ప్రభుత్వం, పేదోడికి రూ. 5 లక్షల ఇందిరమ్మ ఇంటి బిల్లు మంజూరు చేయడానికి మాత్రం 500 రకాల కొర్రీలు పెడుతోందని తప్పుబట్టారు. ఇన్నాళ్లూ తమ సహనాన్ని చేతకానితనంగా భావించవద్దని, పోరాటానికి సమయం వచ్చిందని సంచలన వ్యాఖ్యలు చేశారు. దీనికితోడు తాను గెలిపించిన ఒక ఎమ్మెల్యే కులం కార్డును వాడుకుంటూ అవినీతి అక్రమాలకు పాల్పడుతున్నారంటూ తుంగతుర్తి ఎమ్మెల్యే మందుల సామేల్ తీరును పరోక్షంగా ఎండగట్టారు.
ఈ పరిణామాల నేపథ్యంలో పీసీసీ చీఫ్ మహేశ్ కుమార్ గౌడ్ స్పందిస్తూ.. గత అసెంబ్లీ ఎన్నికల సమయంలో మునుగోడులో ప్రచారం సందర్భంగా రాజగోపాల్ రెడ్డికి పార్టీ అధిష్టానం కొన్ని హామీలు ఇచ్చి ఉండవచ్చని అభిప్రాయపడ్డారు. అయినప్పటికీ తమకు అసంతృప్తి ఉందనే కారణంతో పార్టీకి, ప్రభుత్వానికి వ్యతిరేకంగా బహిరంగంగా మాట్లాడే హక్కు ఎవరికీ లేదని ఖరాకండిగా చెప్పారు. పదవుల కేటాయింపులు, మంత్రివర్గ విస్తరణ వంటి కీలక విషయాలపై కేవలం కాంగ్రెస్ హైకమాండ్ మాత్రమే తుది నిర్ణయం తీసుకుంటుందని స్పష్టం చేశారు.
ఒకేరోజు అందరి కోరికలు, ఆశలు తీర్చడం ఎంతటి వారికైనా సాధ్యం కాదని మహేశ్ కుమార్ గౌడ్ గుర్తుచేశారు. నియోజకవర్గానికి నిధుల కేటాయింపు, మంత్రివర్గంలో స్థానం లభించలేదన్న అసంతృప్తితోనే రాజగోపాల్ రెడ్డి ఇలాంటి వ్యాఖ్యలు చేసి ఉండవచ్చని అభిప్రాయపడ్డారు. అయితే, ఆయన ప్రవర్తనను పార్టీ నాయకత్వం తీవ్రంగా పరిగణిస్తోందని తెలిపారు. ఈ వ్యవహారంపై కాంగ్రెస్ హైకమాండ్తో చర్చించి, దీనిని పార్టీ క్రమశిక్షణా కమిటీకి పంపించే ఆలోచనలో ఉన్నట్లు సంకేతాలు ఇచ్చారు.రాజగోపాల్ రెడ్డి చేసిన వ్యాఖ్యలు ప్రస్తుతం తెలంగాణ రాజకీయాల్లో తీవ్ర సంచలనంగా మారాయి. సొంత పార్టీ ఎమ్మెల్యేనే ప్రభుత్వంపై, కాంట్రాక్టర్ల పెత్తనంపై బహిరంగంగా విమర్శలు గుప్పించడంతో ప్రతిపక్షాలకు కూడా మంచి ఆయుధం లభించినట్లయింది. రాజగోపాల్ రెడ్డి అసంతృప్తిని చల్లార్చేందుకు అధిష్టానం ప్రయత్నిస్తుందా లేక క్రమశిక్షణా చర్యల దిశగా అడుగులు వేస్తుందా అనేది ఇప్పుడు కాంగ్రెస్ వర్గాల్లో ఆసక్తికరంగా మారింది.
