నేతాజీ సుభాష్ చంద్రబోస్కు సంబంధించిన చారిత్రక అంశాలపై తరచూ దాఖలవుతున్న ప్రజాప్రయోజన వ్యాజ్యాల (PIL)పై సుప్రీంకోర్టు తీవ్ర అసహనం వ్యక్తం చేసింది. భారత స్వాతంత్ర్య పోరాటంలో సుభాష్ చంద్రబోస్ స్థాపించిన ఇండియన్ నేషనల్ ఆర్మీ (INA) వల్లే దేశానికి స్వాతంత్ర్యం సాధ్యమైందని ప్రకటించాలని, ఆయనకు ‘జాతీయ పుత్రుడు’ హోదా ఇవ్వాలని కోరుతూ దాఖలైన పిల్ను సోమవారం ధర్మాసనం కొట్టివేసింది.
ఈ పిటిషన్ను ప్రధాన న్యాయమూర్తి సూర్యకాంత్, జస్టిస్ జాయ్మాల్య బాగ్చీలతో కూడిన ధర్మాసనం విచారించింది. ఈ సందర్భంగా పిటిషనర్ పినాక్పాణి మొహంతి గతంలోనూ ఇదే తరహా పిటిషన్ దాఖలు చేసిన విషయాన్ని గుర్తుచేస్తూ కోర్టు తీవ్ర ఆగ్రహం వ్యక్తం చేసింది.
“కేవలం ప్రజాదరణ కోసం ఇలాంటి పిటిషన్లు దాఖలు చేస్తున్నట్లు కనిపిస్తోంది. చారిత్రక వాస్తవాలను న్యాయస్థానాలు నిర్ధారించలేవు” అని ధర్మాసనం ఘాటుగా వ్యాఖ్యానించింది. పిల్ అధికార పరిధిని దుర్వినియోగం చేయవద్దని పిటిషనర్ను హెచ్చరించింది.
పిటిషన్లో మరికొన్ని డిమాండ్లు కూడా ఉన్నాయి. నేతాజీ పుట్టినరోజు జనవరి 23, INA స్థాపన దినోత్సవం అక్టోబర్ 21 తేదీలను జాతీయ సెలవులుగా ప్రకటించాలని కోరారు. అలాగే, ఒడిశాలోని కటక్లో ఉన్న ఆయన జన్మస్థలాన్ని జాతీయ మ్యూజియంగా గుర్తించాలని కూడా అభ్యర్థించారు.
అయితే, ఈ అంశాలు విధాన నిర్ణయాలకు సంబంధించినవని, న్యాయస్థానాలు వాటిపై ఆదేశాలు ఇవ్వలేవని సుప్రీంకోర్టు స్పష్టం చేసింది. చారిత్రక అంశాలపై విభిన్న అభిప్రాయాలు ఉండే అవకాశం ఉన్నందున, వాటిని కోర్టు పరిధిలో విచారించడం సాధ్యం కాదని తెలిపింది.
ఈ తీర్పు ప్రజాప్రయోజన వ్యాజ్యాల దుర్వినియోగంపై మరోసారి చర్చకు దారితీసింది. న్యాయవ్యవస్థ సమయాన్ని వృథా చేసేలా పునరావృత పిటిషన్లు దాఖలు చేయరాదని న్యాయ నిపుణులు అభిప్రాయపడుతున్నారు.
