మానవ అంతరిక్ష యాత్రలో మరో చారిత్రాత్మక అధ్యాయం రాసింది నాసా. చంద్రుడి సమీపానికి పంపిన ఆర్టెమిస్-2 మిషన్ విజయవంతంగా తన యాత్రను పూర్తి చేసి భూమి వైపు తిరుగు ప్రయాణం ప్రారంభించింది. ఈ పరిణామం ప్రపంచవ్యాప్తంగా శాస్త్రవేత్తలు, అంతరిక్షాభిమానులను ఉత్సాహానికి గురిచేస్తోంది.
ఏప్రిల్ 1న ప్రయాణం ప్రారంభించిన ఈ స్పేస్క్రాఫ్ట్, చంద్రుడి చుట్టూ చక్కర్లు కొట్టి ఇప్పుడు భూమి వైపు దూసుకొస్తోంది. అమెరికా కాలమానం ప్రకారం ఏప్రిల్ 10న రాత్రి 8:07 గంటలకు పసిఫిక్ మహాసముద్రంలో స్ప్లాష్డౌన్ అవుతుందని నాసా అంచనా వేస్తోంది. ఈ క్షణం కోసం ప్రపంచవ్యాప్తంగా అంతరిక్ష పరిశోధన రంగం ఆసక్తిగా ఎదురుచూస్తోంది.
సుమారు 50 ఏళ్ల తర్వాత మానవులను లోతైన అంతరిక్షంలోకి తీసుకెళ్లిన ఈ యాత్రకు ప్రత్యేక ప్రాధాన్యం ఉంది. గతంలో జరిగిన అపోలో-13 మిషన్ తర్వాత ఇంత దూరం ప్రయాణించిన మానవ యాత్ర ఇదే కావడం విశేషం. ఈ మిషన్ ద్వారా నాసా తన సాంకేతిక సామర్థ్యాలను మరోసారి ప్రపంచానికి చాటి చెప్పింది.
ఈ యాత్రలో నలుగురు వ్యోమగాములు పాల్గొన్నారు. రీడ్ వైజ్మన్, విక్టర్ గ్లోవర్, క్రిస్టినా కోచ్, జెరెమీ హాన్సెన్ ఈ చారిత్రాత్మక ప్రయాణంలో భాగమయ్యారు. వీరు భూమి నుంచి సుమారు 2,48,655 మైళ్ల దూరం ప్రయాణించి కొత్త రికార్డు సృష్టించారు.
మిషన్లో అత్యంత దూరపు పాయింట్కు చేరినప్పుడు, భూమి, స్పేస్క్రాఫ్ట్ మధ్య దూరం 2,52,756 మైళ్లుగా నమోదైంది. ఇది గత రికార్డులను అధిగమించడం మాత్రమే కాకుండా, భవిష్యత్తులో చంద్రయానాలు, మానవ యాత్రలకు బలమైన పునాది వేసింది.
ఈ మిషన్ ద్వారా సేకరించిన డేటా భవిష్యత్తులో చేపట్టే చంద్ర మిషన్లు, అలాగే మానవులను చంద్రుడిపైకి పంపే లక్ష్యానికి ఎంతో ఉపయోగపడనుంది. నాసా చేపట్టిన ఆర్టెమిస్ ప్రోగ్రామ్లో ఇది కీలక దశగా భావిస్తున్నారు. ఈ మిషన్ విజయంతో మానవ అంతరిక్ష పరిశోధనలో కొత్త అవకాశాలు తెరుచుకున్నాయి. చంద్రుడిపై శాశ్వత స్థావరాల ఏర్పాటు, భవిష్యత్తులో మార్స్ యాత్రలకు ఇది కీలకంగా మారనుంది.
