నగరంలో మహిళల భద్రతపై మరోసారి తీవ్ర ఆందోళన కలిగించే ఘటన వెలుగులోకి వచ్చింది. పట్టపగలు, నడిరోడ్డుపై ఓ మహిళ పట్ల యువకుడు అసభ్యంగా ప్రవర్తించిన ఘటన హైదరాబాద్ నగరంలో కలకలం రేపుతోంది. తన చిన్నారిని ఎత్తుకుని ఇంటికి వెళ్తున్న మహిళను వెనుక నుంచి వచ్చి వేధించిన ఈ ఘటన సీసీటీవీ కెమెరాలో రికార్డ్ కావడంతో విషయం బయటపడింది. ప్రస్తుతం ఈ వీడియో సోషల్ మీడియాలో వైరల్ అవుతుండగా, నగరవాసులు తీవ్ర ఆగ్రహం వ్యక్తం చేస్తున్నారు.
ఈ ఘటన హైదరాబాద్ నగర పరిధిలోని మణికొండ-నెక్నాంపూర్ ప్రాంతంలో చోటుచేసుకుంది. నార్సింగి పోలీస్ స్టేషన్ పరిధిలోని అల్కాపూర్ టౌన్షిప్లో ఈ నెల 14వ తేదీ మధ్యాహ్నం సుమారు 1:44 గంటల సమయంలో ఈ సంఘటన జరిగినట్లు సమాచారం. ప్రాణతి ఈషా అపార్ట్మెంట్ సమీపంలో ఓ మహిళ తన చిన్నారిని ఎడమ చేతితో ఎత్తుకుని, కుడి చేతిలో గొడుగు పట్టుకుని నడుచుకుంటూ వెళ్తోంది. మండుతున్న ఎండ తీవ్రత నుంచి బిడ్డను కాపాడేందుకు ఆమె గొడుగు అడ్డుగా పట్టుకుని నడుస్తోంది.
అదే సమయంలో వెనుక నుంచి వేగంగా వచ్చిన ఓ టీనేజ్ యువకుడు అకస్మాత్తుగా ఆమె వద్దకు చేరుకుని అసభ్యంగా ప్రవర్తించాడు. మహిళ ధరించిన దుస్తులను పైకి లాగుతూ వేధింపులకు పాల్పడినట్లు సీసీటీవీ ఫుటేజీలో కనిపించింది. ఈ పరిణామంతో ఒక్కసారిగా షాక్కు గురైన మహిళ వెంటనే వెనక్కి తిరిగి చూసింది. అయితే అప్పటికే ఆ యువకుడు అక్కడి నుంచి పరుగెత్తుకుంటూ పారిపోయాడు.
ఘటన జరిగిన కొన్ని క్షణాల పాటు ఏమి జరిగిందో అర్థం కాక మహిళ నిశ్చేష్టురాలిగా నిలిచిపోయినట్లు వీడియోలో కనిపిస్తోంది. అనంతరం తేరుకున్న ఆమె, నిందితుడు పారిపోయిన దిశగా నడుచుకుంటూ వెళ్లిన దృశ్యాలు కూడా సీసీటీవీలో రికార్డ్ అయ్యాయి.
ఈ ఘటనకు సంబంధించిన సీసీటీవీ వీడియో సోషల్ మీడియాలో వైరల్ కావడంతో నగర ప్రజల్లో ఆగ్రహం వెల్లువెత్తుతోంది. ముఖ్యంగా నివాస ప్రాంతాల్లో కూడా మహిళలు, పిల్లలు సురక్షితంగా లేరా? అనే ప్రశ్నలు వినిపిస్తున్నాయి. పట్టపగలు ఇలాంటి ఘటన జరగడం నగర భద్రతా వ్యవస్థపై ఆందోళనలను మరింత పెంచింది.
సోషల్ మీడియా వేదికగా పలువురు నెటిజన్లు నిందితుడిని వెంటనే గుర్తించి కఠిన చర్యలు తీసుకోవాలని డిమాండ్ చేస్తున్నారు. మహిళల భద్రత కోసం పోలీసులు మరింత కట్టుదిట్టమైన చర్యలు చేపట్టాలని కోరుతున్నారు. ముఖ్యంగా అపార్ట్మెంట్ కాలనీలు, నివాస ప్రాంతాలు, పాఠశాలల పరిసరాల్లో పోలీసు పహారా పెంచాల్సిన అవసరం ఉందని అభిప్రాయపడుతున్నారు.
ఇటీవల హైదరాబాద్ నగరంలో మహిళలపై వేధింపులు, చోరీలు, రోడ్లపై అసభ్య ప్రవర్తన వంటి ఘటనలు పెరుగుతున్నాయన్న విమర్శలు వినిపిస్తున్నాయి. సీసీటీవీలు, షీ టీమ్స్ వంటి ప్రత్యేక వ్యవస్థలు ఉన్నప్పటికీ కొందరు యువకులు నిర్భయంగా ఇలాంటి చర్యలకు పాల్పడటం ఆందోళన కలిగిస్తోంది.
మహిళలు, ముఖ్యంగా చిన్నారులతో బయటకు వెళ్లే తల్లులు మరింత అప్రమత్తంగా ఉండాల్సిన పరిస్థితులు ఏర్పడుతున్నాయని స్థానికులు ఆవేదన వ్యక్తం చేస్తున్నారు. ఈ ఘటనతో నగరంలోని గేటెడ్ కమ్యూనిటీల భద్రతపై కూడా ప్రశ్నలు తలెత్తుతున్నాయి.
ఈ ఘటనపై సమాచారం అందుకున్న నార్సింగి పోలీసులు కేసు నమోదు చేసి దర్యాప్తు ప్రారంభించినట్లు సమాచారం. సీసీటీవీ ఫుటేజీ ఆధారంగా నిందితుడిని గుర్తించే ప్రయత్నాలు కొనసాగుతున్నాయి. ఘటనకు పాల్పడిన యువకుడు స్థానికుడేనా? లేక బయట నుంచి వచ్చాడా? అనే కోణాల్లో పోలీసులు విచారణ చేపడుతున్నారు.
