ఈ ఏడాది ఎల్నినో ప్రభావం తీవ్రంగా ఉండే అవకాశం ఉందన్న అంచనాల నేపథ్యంలో ఆంధ్రప్రదేశ్ ప్రభుత్వం అప్రమత్తమవుతోంది. వాతావరణ పరిస్థితుల్లో చోటుచేసుకునే మార్పులు వ్యవసాయ రంగంపై తీవ్ర ప్రభావం చూపే అవకాశం ఉన్నందున రైతులను ముందుగానే అప్రమత్తం చేయాలని ముఖ్యమంత్రి చంద్రబాబు నాయుడు అధికారులను ఆదేశించారు. ఎల్నినో కారణంగా వర్షపాతం తక్కువగా ఉండటం, ఉష్ణోగ్రతలు పెరగడం, నీటి లభ్యతలో మార్పులు చోటుచేసుకోవడం వంటి పరిస్థితులు ఏర్పడే అవకాశం ఉన్న నేపథ్యంలో వ్యవసాయ శాఖ ప్రత్యేక ప్రణాళికతో ముందుకు సాగాలని సీఎం సూచించారు.
సోమవారం సచివాలయంలోని ఆర్టీజీఎస్ కేంద్రం నుంచి ముఖ్యమంత్రి వివిధ ప్రభుత్వ శాఖల పనితీరుపై సమీక్ష నిర్వహించారు. ఈ సందర్భంగా వ్యవసాయం, రైతుల సంక్షేమం, పంటల బీమా, ప్రభుత్వ సేవల అమలు, క్షేత్రస్థాయి అధికారుల పనితీరు వంటి పలు అంశాలపై అధికారులతో చర్చించారు.వాతావరణ మార్పుల ప్రభావం రైతులపై నేరుగా పడే అవకాశం ఉన్నందున.. పరిస్థితులను ముందుగానే అంచనా వేసి తగిన చర్యలు తీసుకోవాలని అధికారులకు చంద్రబాబు సూచించారు. రైతులు పంటలు వేసిన తర్వాత సమస్యలు ఎదుర్కొనే పరిస్థితి రాకుండా ముందస్తు ప్రణాళిక రూపొందించాలని ఆదేశించారు.
ఎల్నినో ప్రభావంతో కొన్ని ప్రాంతాల్లో సాధారణ వర్షపాతం నమోదుకాకపోవచ్చన్న అంచనాల నేపథ్యంలో.. రైతులు సంప్రదాయ పంటలపైనే ఆధారపడకుండా ప్రత్యామ్నాయ పంటల సాగుపై దృష్టి పెట్టేలా చేయాలని సీఎం సూచించారు. ఏ ప్రాంతంలో వాతావరణ పరిస్థితులు ఎలా ఉండబోతున్నాయి? అందుబాటులో ఉన్న నీటి వనరులు ఏమిటి? నేల స్వభావం ఎలా ఉంది? వంటి అంశాలను పరిగణనలోకి తీసుకుని ప్రాంతాల వారీగా అనుకూలమైన పంటలను సూచించాలని అధికారులను ఆదేశించారు.రైతులకు కేవలం పంటలు మార్చుకోవాలని చెప్పడం మాత్రమే కాకుండా.. ప్రత్యామ్నాయ పంటల సాగు వల్ల కలిగే ప్రయోజనాలను కూడా వారికి వివరించాలని సీఎం పేర్కొన్నారు. మార్కెట్లో డిమాండ్ ఉన్న పంటలు, తక్కువ నీటితో సాగు చేయగల పంటలు, వాతావరణ మార్పులను తట్టుకునే పంటలపై రైతులకు పూర్తి స్థాయిలో అవగాహన కల్పించాలని సూచించారు.ఈ విషయంలో వ్యవసాయ శాఖ అధికారులు క్షేత్రస్థాయిలో రైతులతో నేరుగా సమావేశాలు నిర్వహించాలని, గ్రామాల వారీగా అవగాహన కార్యక్రమాలు చేపట్టాలని సీఎం ఆదేశించారు.
ఎల్నినో ప్రభావాన్ని ఎదుర్కొనేందుకు రైతులకు అందించాల్సిన సమాచారం విస్తృతంగా చేరేలా ప్రచార కార్యక్రమాలను క్యాంపెయిన్ మోడ్లో నిర్వహించాలని చంద్రబాబు స్పష్టం చేశారు. కేవలం కార్యాలయాలకే పరిమితం కాకుండా గ్రామస్థాయిలో రైతుల వద్దకు అధికారులు వెళ్లాలని సూచించారు.రైతులకు వాతావరణ పరిస్థితులపై ముందస్తు సమాచారం అందేలా చర్యలు తీసుకోవాలని, వ్యవసాయ అధికారులు, శాస్త్రవేత్తలు, సంబంధిత శాఖల సిబ్బంది సమన్వయంతో పనిచేయాలని సీఎం ఆదేశించారు. వర్షపాతం అంచనాలు, నీటి లభ్యత, పంటల ఎంపిక వంటి అంశాలపై రైతులకు ఎప్పటికప్పుడు సమాచారాన్ని అందించాలని సూచించారు.అవసరమైన చోట రైతులకు ప్రత్యామ్నాయ సాగు విధానాలపై శిక్షణ ఇవ్వాలని, పంటల ఎంపికలో శాస్త్రీయ విధానాలను అనుసరించేలా ప్రోత్సహించాలని సీఎం సూచించినట్లు తెలుస్తోంది.
వాతావరణ పరిస్థితుల్లో అనూహ్య మార్పులు చోటుచేసుకుంటే రైతులు ఆర్థికంగా నష్టపోయే అవకాశం ఉన్నందున పంటల బీమా వ్యవస్థను మరింత సమర్థవంతంగా అమలు చేయాలని ముఖ్యమంత్రి ఆదేశించారు. పంటల బీమా యాక్షన్ ప్లాన్ను ముందుగానే సిద్ధం చేసి, అర్హులైన రైతులందరికీ ప్రయోజనం అందేలా చర్యలు తీసుకోవాలని సూచించారు.పంట నష్టాలు సంభవించినప్పుడు రైతులకు పరిహారం అందించడంలో ఆలస్యం జరగకుండా వ్యవస్థను బలోపేతం చేయాలని సీఎం పేర్కొన్నారు. పంటల బీమా పథకాలపై రైతులకు అవగాహన కల్పించడం కూడా ముఖ్యమని అన్నారు.రైతులు తమ పంటలను బీమా పరిధిలోకి తీసుకురావడం ద్వారా ప్రకృతి వైపరీత్యాల సమయంలో ఆర్థిక నష్టాన్ని కొంతవరకు తగ్గించుకునే అవకాశం ఉంటుందని అధికారులు గ్రామస్థాయిలో వివరించాలని సీఎం సూచించారు.
సమీక్ష సమావేశంలో ప్రభుత్వ ఉద్యోగుల పనితీరుపైనా ముఖ్యమంత్రి చంద్రబాబు కీలక వ్యాఖ్యలు చేశారు. ప్రజల అవసరాలు, అంచనాలు, ఆలోచనలకు అనుగుణంగా ప్రభుత్వ ఉద్యోగుల పనితీరు మారాల్సిన అవసరం ఉందని స్పష్టం చేశారు.ప్రభుత్వ సేవలు అందించడంలో నగరాలు, పట్టణాలతో పోలిస్తే మారుమూల ప్రాంతాల్లో కొంత అంతరం కనిపిస్తోందని సీఎం పేర్కొన్నారు. గ్రామీణ, వెనుకబడిన ప్రాంతాల్లో ప్రజలకు ప్రభుత్వ సేవలు సకాలంలో అందుతున్నాయా? లేదా? అనే అంశాన్ని అధికారులు నిరంతరం పరిశీలించాలని సూచించారు.ప్రజలకు ప్రభుత్వ కార్యాలయాల చుట్టూ తిరిగే పరిస్థితి లేకుండా.. అవసరమైన సేవలు సులభంగా, వేగంగా అందేలా వ్యవస్థను రూపొందించాలని సీఎం ఆదేశించారు.
ఇటీవల ఆలూరు నియోజకవర్గంలో తాను చేపట్టిన పర్యటన సందర్భంగా ప్రజల నుంచి వచ్చిన అభిప్రాయాలను కూడా ముఖ్యమంత్రి అధికారుల దృష్టికి తీసుకువచ్చారు. క్షేత్రస్థాయిలో ప్రభుత్వ ఉద్యోగుల పనితీరుపై ప్రజల్లో కొన్ని అసంతృప్తులు ఉన్నాయని, వాటిని అధికారులు సీరియస్గా తీసుకోవాలని సూచించారు.ప్రజలు ప్రభుత్వ యంత్రాంగంలో మార్పును కోరుకుంటున్నారని చంద్రబాబు పేర్కొన్నారు. ప్రభుత్వ పథకాలు, సేవలు కేవలం కాగితాలపై కాకుండా ప్రజలకు ప్రత్యక్షంగా కనిపించేలా అమలు చేయాలని అన్నారు.ప్రజలతో నేరుగా సంబంధం ఉన్న అధికారులు తమ పనితీరును మెరుగుపరుచుకోవాలని, క్షేత్రస్థాయిలో సమస్యలను గుర్తించి వాటికి పరిష్కారాలు చూపాలని సూచించారు. ప్రజల నుంచి వచ్చే ఫిర్యాదులు, సూచనలను నిర్లక్ష్యం చేయకుండా వాటిపై వేగంగా స్పందించాలని ఆదేశించారు.
ప్రభుత్వం తీసుకునే నిర్ణయాలు ప్రజలకు చేరాలంటే క్షేత్రస్థాయి యంత్రాంగం సమర్థవంతంగా పనిచేయాల్సిన అవసరం ఉందని సీఎం స్పష్టం చేశారు. ముఖ్యంగా మారుమూల ప్రాంతాల్లో ప్రభుత్వ సేవలు అందించడంలో ఎదురయ్యే సమస్యలను గుర్తించి పరిష్కరించాలని అధికారులకు సూచించారు.రైతులు, పేదలు, గ్రామీణ ప్రజలు ప్రభుత్వంపై ఆధారపడే సందర్భాల్లో అధికారుల స్పందన కీలకంగా ఉంటుందని పేర్కొన్నారు. ప్రజలు ప్రభుత్వ కార్యాలయాలకు వచ్చినప్పుడు వారి సమస్యలను వినడమే కాకుండా.. వాటికి పరిష్కారం చూపే దిశగా అధికారులు పనిచేయాలని అన్నారు.
