కర్ణాటక రాజకీయాల్లో కీలక పరిణామంగా కాంగ్రెస్ సీనియర్ నేత డి.కె. శివకుమార్ బుధవారం రాష్ట్ర నూతన ముఖ్యమంత్రిగా ప్రమాణ స్వీకారం చేశారు. బెంగళూరులోని లోక్ భవన్ గ్లాస్ హౌస్లో జరిగిన ఘన కార్యక్రమంలో కర్ణాటక గవర్నర్ థావర్ చంద్ గెహ్లాట్ ఆయనతో పదవి, గోప్యత ప్రమాణం చేయించారు. రాజ్యాంగ గ్రంథాన్ని చేతిలో పట్టుకుని డీకే శివకుమార్ ప్రమాణ స్వీకారం చేయడం కార్యక్రమానికి ప్రత్యేక ఆకర్షణగా నిలిచింది. ఈ పరిణామంతో కర్ణాటకలో కాంగ్రెస్ ప్రభుత్వానికి కొత్త నాయకత్వం ప్రారంభమైనట్లు అయింది.
కాంగ్రెస్ పార్టీ అంతర్గత నిర్ణయాల అనంతరం శాసనసభ పక్ష నేతగా ఎన్నికైన డీకే శివకుమార్ ముఖ్యమంత్రి పదవిని చేపట్టారు. గత కొంతకాలంగా కొనసాగిన నాయకత్వ మార్పు చర్చలకు తెరపడుతూ ఆయన రాష్ట్ర 25వ ముఖ్యమంత్రిగా బాధ్యతలు స్వీకరించారు. కాంగ్రెస్ అధిష్ఠానం తీసుకున్న ఈ నిర్ణయం కర్ణాటక రాజకీయాల్లో కొత్త సమీకరణాలకు దారితీసిందని రాజకీయ విశ్లేషకులు భావిస్తున్నారు.
ప్రమాణ స్వీకార కార్యక్రమానికి కాంగ్రెస్ జాతీయ అధ్యక్షుడు మల్లికార్జున ఖర్గే, లోక్సభ ప్రతిపక్ష నాయకుడు రాహుల్ గాంధీ, మాజీ ముఖ్యమంత్రి సిద్ధరామయ్య, తెలంగాణ ముఖ్యమంత్రి రేవంత్ రెడ్డి, తెలంగాణ మంత్రులు పొంగులేటి శ్రీనివాస్ రెడ్డి, మల్లు భట్టి విక్రమార్క తదితర ప్రముఖులు హాజరయ్యారు. వివిధ రాష్ట్రాల నుంచి కాంగ్రెస్ నాయకులు, ప్రజాప్రతినిధులు, పార్టీ కార్యకర్తలు పెద్ద సంఖ్యలో పాల్గొన్నారు.
కర్ణాటక కొత్త మంత్రివర్గంలో మాజీ ముఖ్యమంత్రి సిద్ధరామయ్య కుమారుడు యతీంద్ర సిద్ధరామయ్యకు చోటు కల్పించడం రాజకీయంగా ప్రాధాన్యం సంతరించుకుంది. కాంగ్రెస్లో తరాల మార్పు, యువ నాయకత్వానికి ప్రాధాన్యం కల్పిస్తున్న సంకేతంగా దీనిని పరిశీలిస్తున్నారు. అదే సమయంలో సీనియర్ కాంగ్రెస్ నేత జి. పరమేశ్వర రాష్ట్ర ఏకైక ఉప ముఖ్యమంత్రిగా ప్రమాణ స్వీకారం చేశారు.
ముఖ్యమంత్రితో పాటు మొత్తం 14 మంది మంత్రులు ప్రమాణ స్వీకారం చేశారు. కొత్త మంత్రివర్గంలో ప్రాంతీయ, సామాజిక, రాజకీయ సమతుల్యతకు కాంగ్రెస్ అధిష్ఠానం ప్రాధాన్యం ఇచ్చినట్లు తెలుస్తోంది. శాఖల కేటాయింపుపై త్వరలో అధికారిక ప్రకటన వెలువడే అవకాశం ఉందని పార్టీ వర్గాలు పేర్కొంటున్నాయి.
ప్రమాణ స్వీకారం అనంతరం డీకే శివకుమార్ మాట్లాడుతూ ప్రజల విశ్వాసాన్ని నిలబెట్టుకునే విధంగా పనిచేస్తానని హామీ ఇచ్చారు. రాష్ట్ర అభివృద్ధి, సంక్షేమ కార్యక్రమాల అమలు, పెట్టుబడుల ఆకర్షణ, మౌలిక సదుపాయాల అభివృద్ధిపై ప్రత్యేక దృష్టి సారిస్తామని చెప్పారు. కాంగ్రెస్ పార్టీ సిద్ధాంతాలకు అనుగుణంగా ప్రజా సంక్షేమ పాలన అందించడమే తమ లక్ష్యమని పేర్కొన్నారు.
