అస్సాం సీఎంగా మళ్లీ హిమంత బిశ్వ శర్మ

అస్సాం ముఖ్యమంత్రిగా హిమంత్​ బిశ్వ శర్మా రెండోసారి బాధ్యతలు చేపట్టనున్నారు. భారత రాజ్యాంగంలోని ఆర్టికల్ 164(1) ప్రకారం ఆయన్ను ముఖ్యమంత్రిగా నియమిస్తున్నట్లు అస్సాం గవర్నర్ లక్ష్మణ్​ ప్రసాద్​ ఆచార్య ఆదివారం అధికారికంగా ప్రకటించారు. ఈ మేరకు విడుదలైన ప్రకటనతో రాష్ట్ర రాజకీయాల్లో కీలక పరిణామం చోటుచేసుకుంది.

అధికారిక షెడ్యూల్ ప్రకారం, మే 12న ఉదయం 11:40 గంటలకు గౌహతిలోని ఖానాపరా వెటర్నరీ కాలేజ్ మైదానంలో హిమంత బిశ్వ శర్మ ప్రమాణ స్వీకార కార్యక్రమం ఘనంగా జరగనుంది. ఈ కార్యక్రమానికి బీజేపీ జాతీయ నాయకత్వంతో పాటు ఎన్డీఏ మిత్రపక్షాల ప్రముఖులు, పలువురు ముఖ్య నేతలు హాజరయ్యే అవకాశం ఉందని సమాచారం.

ఈ మేరకు పార్లమెంటరీ వ్యవహారాల శాఖ అధికారిక నోటిఫికేషన్ విడుదల చేసింది. రాష్ట్ర ప్రభుత్వ ప్రధాన కార్యదర్శి రవి కోట కూడా ఇందుకు సంబంధించిన ఉత్తర్వులు జారీ చేశారు. ప్రమాణ స్వీకార కార్యక్రమానికి సంబంధించి అన్ని ఏర్పాట్లు ఇప్పటికే ప్రారంభమైనట్లు అధికార వర్గాలు తెలిపాయి.

హిమంత బిశ్వ శర్మ ఆదివారం రాజ్ భవన్‌కు వెళ్లి గవర్నర్‌ను మర్యాదపూర్వకంగా కలిశారు. ప్రభుత్వం ఏర్పాటు చేసేందుకు అవకాశం కల్పించాలని కోరుతూ అధికారికంగా తన హక్కును వినియోగించుకున్నారు. అనంతరం గవర్నర్ ఆయనకు ప్రభుత్వం ఏర్పాటు చేసేందుకు ఆహ్వానం పలికారు.

అదే రోజు గౌహతిలో జరిగిన బీజేపీ శాసనసభాపక్ష సమావేశంలో హిమంతను ఏకగ్రీవంగా శాసనసభాపక్ష నేతగా ఎన్నుకున్నారు. ఈ సమావేశానికి పార్టీ కేంద్ర పరిశీలకులుగా కేంద్ర మంత్రి జేపీ నడ్డా, హర్యానా ముఖ్యమంత్రి నాయబ్ సింగ్ సైనీహాజరయ్యారు.

సమావేశంలో ఎన్డీఏ శాసనసభాపక్ష నేతగా హిమంత బిశ్వ శర్మ పేరును జేపీ నడ్డా అధికారికంగా ప్రకటించారు. అనంతరం ఎమ్మెల్యేలు ఆయన నాయకత్వానికి మద్దతు తెలుపుతూ అభినందనలు తెలిపారు. అసోం గణ పరిషత్ (ఏజీపీ), బోడోలాండ్ పీపుల్స్ ఫ్రంట్ (బీపీఎఫ్) వంటి మిత్రపక్షాలు కూడా హిమంత నాయకత్వానికి పూర్తి మద్దతు ప్రకటించాయి.

హిమంత బిశ్వ శర్మ గత కొన్నేళ్లుగా అస్సాం రాజకీయాల్లో అత్యంత ప్రభావశీల నేతగా ఎదిగారు. కాంగ్రెస్ పార్టీ నుంచి రాజకీయ ప్రస్థానం ప్రారంభించిన ఆయన, అనంతరం బీజేపీలో చేరి ఈశాన్య భారత రాజకీయాల్లో కీలక పాత్ర పోషించారు. ముఖ్యంగా అస్సాంలో బీజేపీ బలోపేతానికి ఆయన చేసిన కృషి పార్టీకి పెద్ద బలంగా నిలిచింది.

ముఖ్యమంత్రిగా తొలి పదవీకాలంలో హిమంత బిశ్వ శర్మ పలు అభివృద్ధి కార్యక్రమాలు చేపట్టారు. మౌలిక వసతులు, ఆరోగ్యం, విద్య, శాంతిభద్రతలు, పెట్టుబడుల ఆకర్షణ వంటి అంశాల్లో ఆయన ప్రభుత్వం తీసుకున్న చర్యలు రాజకీయంగా మంచి గుర్తింపు తెచ్చుకున్నాయి.

అస్సాంలో బీజేపీ వరుసగా అధికారాన్ని నిలబెట్టుకోవడంలో హిమంత నాయకత్వం కీలక పాత్ర పోషించిందని రాజకీయ విశ్లేషకులు అభిప్రాయపడుతున్నారు. ముఖ్యంగా ఈశాన్య రాష్ట్రాల్లో ఎన్డీఏ ప్రభావాన్ని పెంచడంలో ఆయన వ్యూహాలు ప్రభావవంతంగా పనిచేశాయని చెబుతున్నారు.

ఇక రెండోసారి సీఎంగా బాధ్యతలు చేపట్టనున్న హిమంత బిశ్వ శర్మపై ప్రజల్లో కూడా భారీ అంచనాలు ఉన్నాయి. రాష్ట్ర అభివృద్ధి, పెట్టుబడులు, ఉపాధి అవకాశాలు, మౌలిక సదుపాయాల విస్తరణపై ఆయన ప్రభుత్వం మరింత దృష్టి సారించే అవకాశాలు కనిపిస్తున్నాయి.