ఆంధ్రప్రదేశ్లోని చిత్తూరు జిల్లాలో దారుణ ఘటన చోటుచేసుకుంది. ప్రముఖ మీడియా సంస్థ ఏబీఎన్ లో పనిచేస్తున్న జర్నలిస్ట్ జగన్మోహన్ రెడ్డిని దుండగులు కిరాతకంగా హత్య చేయడం రాష్ట్రవ్యాప్తంగా కలకలం రేపింది. ఈ ఘటన వి. కోట పట్టణంలో మంగళవారం ఉదయం జరిగింది.
జగన్మోహన్ రెడ్డి ప్రతిరోజు లాగే ఉదయం మార్నింగ్ వాక్కు వెళ్లారు. అదే సమయంలో ద్విచక్ర వాహనంపై వచ్చిన ఇద్దరు దుండగులు ఆయనను లక్ష్యంగా చేసుకుని కత్తులతో దాడి చేశారు. ఈ దాడి తీవ్రంగా గాయపడిన జగన్మోహన్ అక్కడికక్కడే ప్రాణాలు కోల్పోయారు. ఘటన అనంతరం దుండగులు అక్కడి నుంచి పరారయ్యారు.
ఉదయం సమయంలోనే జనసంచారం ఉన్న ప్రదేశంలో ఇలాంటి ఘటన జరగడం ప్రజలను షాక్కు గురిచేసింది. సమాచారం అందుకున్న పోలీసులు వెంటనే సంఘటనా స్థలానికి చేరుకుని పరిసరాలను పరిశీలించారు. ఆధారాలు సేకరించి కేసు నమోదు చేశారు.
ఈ హత్య కేసులో వి. కోటకు చెందిన రౌడీషీటర్ తమీమ్ను పోలీసులు ప్రధాన నిందితుడిగా గుర్తించారు. పాత వైరం, వ్యక్తిగత విభేదాల కోణంలో పోలీసులు దర్యాప్తు కొనసాగిస్తున్నారు. నిందితుడు ప్రస్తుతం పొరుగు రాష్ట్రం కర్ణాటకలో తలదాచుకున్నట్లు సమాచారం. అతడిని పట్టుకునేందుకు ప్రత్యేక బృందాలను ఏర్పాటు చేసి గాలింపు చర్యలు ముమ్మరం చేశారు.
మృతదేహాన్ని పోస్టుమార్టం నిమిత్తం పలమనేరు ప్రభుత్వ ఆసుపత్రికి తరలించారు. కుటుంబ సభ్యులకు సమాచారం అందించి, అనంతర క్రియల కోసం చర్యలు చేపట్టారు. జర్నలిస్ట్ హత్య వార్త తెలిసిన వెంటనే మీడియా వర్గాలు తీవ్ర ఆవేదన వ్యక్తం చేస్తున్నాయి. నిందితులను త్వరగా అరెస్ట్ చేసి కఠిన చర్యలు తీసుకోవాలని డిమాండ్ చేస్తున్నారు.
వార్తలు సేకరించే క్రమంలో లేదా వ్యక్తిగత కారణాలతో జర్నలిస్టులు లక్ష్యంగా మారుతున్న ఘటనలు పెరుగుతున్నాయనే ఆందోళనలు వ్యక్తమవుతున్నాయి. ప్రభుత్వం, పోలీసు యంత్రాంగం ఈ అంశంపై ప్రత్యేక దృష్టి సారించాల్సిన అవసరం ఉందని నిపుణులు అభిప్రాయపడుతున్నారు.
జిల్లా పోలీసులు ఈ కేసును అత్యంత ప్రాధాన్యంతో తీసుకుని త్వరలోనే నిందితుడిని అదుపులోకి తీసుకుంటామని తెలిపారు. సీసీటీవీ ఫుటేజ్, సాంకేతిక ఆధారాలను పరిశీలిస్తూ దర్యాప్తు వేగవంతం చేశారు. ఘటనకు సంబంధించిన పూర్తి వివరాలు త్వరలో వెలుగులోకి వచ్చే అవకాశముంది.
