మహిళల భద్రతలో టెక్నాలజీ కీలక పాత్ర పోషిస్తున్నదనడానికి మరో స్పష్టమైన ఉదాహరణగా నిలిచింది మంగళగిరి పరిధిలో జరిగిన ఈ ఘటన. శక్తి యాప్, పోలీసుల అప్రమత్తతతో ఓ ఇంజినీరింగ్ విద్యార్థిని అర్ధరాత్రి ప్రమాదం నుంచి సురక్షితంగా బయటపడిన సంఘటన రాష్ట్రవ్యాప్తంగా చర్చనీయాంశమైంది. ఈ ఘటనపై మంత్రి నారా లోకేష్ స్పందిస్తూ.. మహిళల భద్రత కోసం సాంకేతికతను సమర్థంగా వినియోగించుకోవడం ఎంత ముఖ్యమో ఈ సంఘటన నిరూపించిందని పేర్కొన్నారు.
ఆంధ్రప్రదేశ్లోని నంబురుకు చెందిన ఓ ఇంజినీరింగ్ విద్యార్థిని బెంగళూరు నుంచి అర్ధరాత్రి సమయంలో విజయవాడ బస్టాండ్కు చేరుకుంది. అక్కడి నుంచి తన ఇంటికి వెళ్లేందుకు ఆమె ఒక ఆటో ఎక్కింది. ప్రారంభంలో సాధారణంగా ప్రయాణం సాగినప్పటికీ, మార్గమధ్యంలో పరిస్థితి అనుమానాస్పదంగా మారింది.
నిర్మానుష్య ప్రాంతంలోకి రాగానే ఆటో డ్రైవర్ బొమ్మనపల్లి ఫణీంద్రకుమార్ వాహనం వేగాన్ని తగ్గించి, యువతితో అసభ్యంగా ప్రవర్తించడం ప్రారంభించాడు. దీనితో భయాందోళనకు గురైన యువతి వెంటనే అప్రమత్తమైంది. తన మొబైల్ ఫోన్లో ఉన్న శక్తి యాప్ను తెరిచి ఎమర్జెన్సీ బటన్ను నొక్కింది. ఈ చర్యతో ఆమె లొకేషన్, ప్రమాద సూచన వెంటనే పోలీసులకు చేరింది.
అలర్ట్ అందుకున్న వెంటనే మంగళగిరి రూరల్ పోలీసు సిబ్బంది స్పందించారు. ఎస్సై వెంకట్ నేతృత్వంలోని బృందం తక్షణమే రంగంలోకి దిగింది. యాప్ ద్వారా అందిన లైవ్ లొకేషన్ ఆధారంగా ఆటో వాహనాన్ని ట్రాక్ చేస్తూ, కాజా సమీపంలో అడ్డగించారు. పోలీసులను గమనించిన డ్రైవర్ తప్పించుకునేందుకు ప్రయత్నించినప్పటికీ, వెంటనే అతన్ని అదుపులోకి తీసుకుని అరెస్ట్ చేశారు.
ఈ ఘటనలో యువతికి ఎలాంటి హాని జరగకుండా సురక్షితంగా బయటపడడం అందరికీ ఊరటనిచ్చింది. అనంతరం పోలీసులు ఆమెను భద్రంగా ఇంటికి చేర్చారు. ఈ ఘటనలో శక్తి యాప్ సమయానికి పనిచేయడం, పోలీసుల వేగవంతమైన స్పందన కీలకంగా మారాయి.
ఈ సంఘటనపై మంత్రి నారా లోకేశ్ స్పందిస్తూ, రాష్ట్ర ప్రభుత్వం మహిళల భద్రత కోసం తీసుకుంటున్న చర్యలు ఫలిస్తున్నాయని తెలిపారు. శక్తి యాప్ వంటి సాంకేతిక పరిజ్ఞానం మహిళలకు రక్షణ కవచంలా మారిందన్నారు. ఇలాంటి యాప్ల వినియోగంపై మహిళల్లో మరింత అవగాహన కల్పించాల్సిన అవసరం ఉందని సూచించారు.
పోలీసులు కూడా ఈ ఘటనను ఒక ఉదాహరణగా తీసుకుని, ఎమర్జెన్సీ సర్వీసులు ఎంత సమర్థంగా పనిచేస్తున్నాయో వెల్లడించారు. ప్రతి మహిళ తన భద్రత కోసం ఇలాంటి యాప్లను వినియోగించుకోవాలని సూచించారు.
