ఉత్తరప్రదేశ్ రాష్ట్రంలోని మీర్జాపూర్ జిల్లాలో బుధవారం రాత్రి జరిగిన ఘోర రోడ్డు ప్రమాదం రాష్ట్రాన్ని కలవరపరిచింది. ఒక ట్రక్కు అదుపుతప్పి మరో ట్రక్కుతో పాటు రెండు కార్లపైకి దూసుకెళ్లడంతో సంభవించిన ఈ ప్రమాదంలో 11 మంది సజీవదహనమవడం తీవ్ర విషాదాన్ని మిగిల్చింది. ఒక్కసారిగా మంటలు చెలరేగడంతో వాహనాలు పూర్తిగా దగ్ధమవగా, లోపల చిక్కుకున్న వారు బయటకు రావడానికి అవకాశమే లేకపోయింది.
పోలీసులు తెలిపిన వివరాల ప్రకారం, డ్రామాండ్గంజ్ లోయ నుంచి లాసోడా ప్రాంతం వైపు వెళ్తున్న రహదారిపై చోటుచేసుకుంది. వేగంగా వెళ్తున్న ఓ ట్రక్కు అకస్మాత్తుగా అదుపుతప్పి ముందున్న మరో ట్రక్కు మరియు రెండు కార్లను ఢీకొట్టింది. ఢీకొన్న దెబ్బకు కార్లు రెండు ట్రక్కుల మధ్య ఇరుక్కుపోయి పూర్తిగా నుజ్జునుజ్జయ్యాయి. ప్రమాదం జరిగిన వెంటనే కార్లలో నుంచి మంటలు చెలరేగాయి. ఇంధనం లీక్ కావడం, ఢీకొన్న ప్రభావం తీవ్రంగా ఉండటం వల్ల క్షణాల్లోనే మంటలు అన్ని వాహనాలకు వ్యాపించాయి.
మంటల తీవ్రత ఎక్కువగా ఉండటంతో వాహనాల్లో ఉన్నవారు బయటపడే అవకాశం లేకపోయింది. దీంతో 11 మంది అక్కడికక్కడే సజీవదహనమయ్యారు. ఈ దృశ్యాలు అక్కడి ప్రజలను దిగ్భ్రాంతికి గురిచేశాయి. ఈ ప్రమాదంలో మరికొంతమంది తీవ్రంగా గాయపడ్డారు. సమాచారం అందుకున్న వెంటనే పోలీసులు, అగ్నిమాపక సిబ్బంది సంఘటన స్థలానికి చేరుకుని సహాయక చర్యలు ప్రారంభించారు. మంటలను అదుపులోకి తీసుకురావడానికి తీవ్రంగా శ్రమించారు. గాయపడిన వారిని సమీప ఆస్పత్రులకు తరలించారు.
వారి పరిస్థితి విషమంగా ఉన్నట్లు సమాచారం. ప్రమాదానికి కారణాలపై పోలీసులు ప్రాథమికంగా దర్యాప్తు చేపట్టగా, ట్రక్కు బ్రేకులు ఫెయిల్ కావడం వల్లే ఈ ఘటన జరిగి ఉండొచ్చని అనుమానిస్తున్నారు. మీర్జాపూర్ జిల్లా ఎస్పీ అపర్ణ రజత్ కౌశిక్ మాట్లాడుతూ, బ్రేక్ వ్యవస్థలో లోపం కారణంగా ట్రక్కు నియంత్రణ కోల్పోయి ఉండొచ్చని తెలిపారు. పూర్తి స్థాయి దర్యాప్తు తర్వాత మాత్రమే ఖచ్చితమైన కారణం వెల్లడవుతుందని ఆమె స్పష్టం చేశారు. ఈ ప్రమాదంలో పాల్గొన్న వాహనాల వివరాలను కూడా పోలీసులు వెల్లడించారు.
ప్రమాదానికి కారణమైన ట్రక్కుకు బిహార్ రాష్ట్ర రిజిస్ట్రేషన్ నంబర్ ఉండగా, మరో ట్రక్కు మధ్యప్రదేశ్ రాష్ట్రానికి చెందినదిగా గుర్తించారు. ఢీకొన్న రెండు కార్లలో ఒకటి సోన్భద్ర జిల్లాకు చెందినదిగా, మరొకటి మీర్జాపూర్ జిల్లాకు చెందినదిగా అధికారులు తెలిపారు. ఘటన స్థలంలో జరిగిన విధ్వంసం తీవ్రతను చూస్తే ప్రమాదం ఎంత భయానకంగా జరిగిందో అర్థమవుతుంది. పూర్తిగా కాలిపోయిన వాహనాల అవశేషాలు, చుట్టుపక్కల ప్రాంతంలో వ్యాపించిన పొగ, మంటల ఆనవాళ్లు అక్కడి పరిస్థితిని స్పష్టంగా చూపించాయి. స్థానికులు సహాయక చర్యల్లో పాల్గొని గాయపడిన వారిని బయటకు తీసేందుకు ప్రయత్నించారు.
