చెన్నై సూపర్ కింగ్స్ (సీఎస్కే) శిబిరంలో తీవ్ర విషాదం నెలకొంది. ఆ జట్టుకు చెందిన యువ ఫాస్ట్ బౌలర్ ముఖేష్ తల్లి ప్రేమ్ దేవి మంగళవారం కన్నుమూశారు. గతేడాది కాలంగా అనారోగ్యంతో బాధపడుతున్న ఆమె, ముంబైలోని టాట మెమోరియల్ ఆసుపత్రిలో చికిత్స పొందుతూ తుదిశ్వాస విడిచారు. ఈ వార్త బయటకు రావడంతో క్రికెట్ వర్గాల్లో తీవ్ర విషాదం నెలకొంది.
ప్రేమ్ దేవి అనారోగ్యం కారణంగా గత కొంతకాలంగా ఆసుపత్రిలో చికిత్స పొందుతున్నట్లు కుటుంబ సభ్యులు తెలిపారు. వైద్యుల పర్యవేక్షణలో ఉన్నప్పటికీ ఆమె ఆరోగ్యం క్రమంగా క్షీణించడంతో చివరకు మంగళవారం మరణించారు. ఈ విషాద వార్త తెలిసిన వెంటనే సీఎస్కే యాజమాన్యం, సహచర ఆటగాళ్లు ముకేశ్ చౌదరికి సానుభూతి తెలియజేశారు. జట్టులో ఒక ముఖ్యమైన యువ ఆటగాడికి ఈ పరిస్థితి ఎదురుకావడం అందరినీ కలచివేసింది.
సన్ రైజర్స్ హైదరాబాద్ తో జరిగిన మ్యాచ్ ముగిసిన వెంటనే ముకేశ్ చౌదరి తన స్వస్థలమైన రాజస్థాన్లోని భిల్వారాకు హుటాహుటిన బయలుదేరి వెళ్లారు. తన కుటుంబ సభ్యులతో కలిసి ఉండేందుకు ఆయన తక్షణమే ప్రయాణం ప్రారంభించారు. అనంతరం తన అన్న డాక్టర్ రాజేశ్ చౌదరితో కలిసి తల్లి అంత్యక్రియలు పూర్తి చేశారు. ఈ క్రమంలో కుటుంబ సభ్యులు, బంధువులు ఆయనకు మానసిక ధైర్యం చెప్పేందుకు ముందుకు వచ్చారు.
ఈ విషాద సమయంలో సీఎస్కే కెప్టెన్ ఎం ఎస్ దోని ముకేశ్ చౌదరికి అండగా నిలిచిన తీరు అందరినీ కదిలించింది. ధోనీ కేవలం జట్టు నాయకుడిగానే కాకుండా, ఒక పెద్ద అన్నలా వ్యవహరించినట్లు సహచరులు పేర్కొన్నారు. ముకేశ్తో నిరంతరం ఫోన్లో మాట్లాడుతూ ధైర్యం చెప్పడమే కాకుండా, సమయం దొరికినప్పుడు ఆసుపత్రికి వెళ్లి ప్రేమ్ దేవిని పరామర్శించినట్లు సమాచారం.
ధోనీ యొక్క ఈ మానవత్వం మరోసారి వెలుగులోకి వచ్చింది. గతంలో కూడా కష్టాల్లో ఉన్న సహచర ఆటగాళ్లకు అండగా నిలిచిన సందర్భాలు ఎన్నో ఉన్నాయి. ఈ ఘటనతో ఆయన వ్యక్తిత్వం మరోసారి అందరికీ స్పష్టమైంది. ఆటగాళ్లతో ఆయనకు ఉన్న అనుబంధం కేవలం ఆటకే పరిమితం కాకుండా, వ్యక్తిగత జీవితంలో కూడా ఎంత బలంగా ఉంటుందో ఇది చూపించింది.
