దివంగత ముఖ్యమంత్రి వైఎస్ రాజశేఖరరెడ్డి చేపట్టిన చారిత్రాత్మక పాదయాత్రకు నేటితో 23 ఏళ్లు పూర్తి అయ్యాయి. ఈ సందర్భంలో వైసీపీ అధినoత వైఎస్ జగన్ తన తండ్రి స్మృతులను నెమరువేసి, భావోద్వేగంతో
ట్వీట్ చేశారు.
2003 ఏప్రిల్ 9వ తేదీన, ఎర్రటి ఎండ కింద వైఎస్సార్ ప్రారంభించిన పాదయాత్ర కేవలం ఒక రాజకీయ ప్రయాణం మాత్రమే కాక, ఆంధ్రప్రదేశ్ రాజకీయ చరిత్రను తిరగరాసిన ఘట్టం అని జగన్ గుర్తు చేశారు. ఆ యాత్ర ద్వారా వైఎస్సార్ ప్రజల కష్టాలను ప్రత్యక్షంగా తెలుసుకోవడానికి ప్రయత్నించి, ప్రతి ఇంటిలో వ్యక్తిగతంగా ‘నేనున్నాననే భరోసా’ని నింపారన్నారు.
వైఎస్సార్ పాదయాత్ర 60 రోజులుగా సాగి రాష్ట్రంలోని అన్ని జిల్లాల ప్రజలను చేరింది. గ్రామీణ ప్రజల సమస్యలను, ఆర్థిక కష్టాలను, వ్యవసాయ సమస్యలను ప్రత్యక్షంగా పరిశీలించడం ద్వారా వైఎస్సార్ తన రాజకీయ నాయకత్వాన్ని సుస్థిరం చేసుకున్నారు. ఈ విషయాన్ని జగన్ ట్వీట్లో తన తండ్రి ప్రజలతో ఏర్పరిచిన బంధాన్ని గుర్తు చేసుకుంటూ, ఆ యాత్ర ప్రజలలో వ్యక్తిగత అనుబంధాన్నిపెంచిన ఘట్టమని గుర్తు చేశారు.
వైఎస్సార్ చేపట్టిన ఈ యాత్ర రాజకీయ నేతలకు ఓ పాఠంగా నలిచింది. పాదయాత్రలో ప్రజల సమస్యలను దృష్టిలో పెట్టి తీసుకున్న విధానాలు, ఆయన రాజకీయ విజయం కోసం మాత్రమే కాక, ప్రజల సంక్షేమానికి దారి తీశాయి. ఈ యాత్ర అనంతరం వైఎస్సార్ నాటి ఉమ్మడి ఆంధ్రప్రదేశ్ కి ముఖ్యమంత్రిగా గెలిచారు.
వైఎస్సార్ పాదయాత్రతో ఏర్పడిన మానవీయ స్పర్శ, ప్రజల సమస్యలపై సమగ్ర అవగాహన, రాష్ట్ర రాజకీయాలపై దీర్ఘకాల ప్రభావం, ఈ యాత్రను చారిత్రాత్మకంగా నిలిపాయి. జగన్ ఈ సందర్భాన్ని అభిమానులకు, పార్టీ కార్యకర్తలకు జ్ఞాపకరూపంగా పంచి, తండ్రి రాజకీయ స్ఫూర్తిని కొనసాగిస్తున్నారని తెలిపారు.
సాగునీటి ప్రాజెక్టుల నిర్మాణం, పోలవరం పనుల వేగవంతం ద్వారా రాష్ట్ర రూపురేఖలను ఆయన మార్చేశారని జగన్ వివరించారు. వైఎస్సార్ ఆశయాలకు అనుగుణంగా, తన తండ్రి బాటలోనే ప్రజల కోసం తన ప్రయాణం నిరంతరం కొనసాగుతుందని జగన్ మరోసారి స్పష్టం చేశారు.
