టాలీవుడ్ యంగ్ హీరో విజయ్ దేవరకొండ పుట్టినరోజు సందర్భంగా ఆయన అభిమానులకు చిత్రబృందం ప్రత్యేక కానుక అందించింది. విజయ్ నటిస్తున్న భారీ పాన్ ఇండియా చిత్రం రణబాలి నుంచి ప్రత్యేక మేకింగ్ గ్లింప్స్ను విడుదల చేయడంతో సోషల్ మీడియాలో భారీ స్పందన వ్యక్తమవుతోంది. ముఖ్యంగా ఈ వీడియోలో విజయ్ దేవరకొండ తన పాత్ర కోసం పడిన కష్టం, అంకితభావం, శ్రమను చూపించిన తీరు అభిమానులను ఆకట్టుకుంటోంది.
ఈ చిత్రానికి రాహుల్ సంక్రిత్యాన్ దర్శకత్వం వహిస్తున్నారు. ప్రముఖ నిర్మాణ సంస్థ మైత్రీ మూవీ మేకర్స్ పతాకంపై నవీన్ యెర్నేని, వై. రవిశంకర్ ఈ చిత్రాన్ని అత్యంత భారీ బడ్జెట్తో నిర్మిస్తున్నారు. ఇప్పటికే ఈ ప్రాజెక్ట్పై సినీ వర్గాల్లో భారీ అంచనాలు నెలకొన్నాయి. ఇందులో విజయ్ దేవరకొండకు జోడీగా రష్మికా మందన నటిస్తున్నారు. ‘గీత గోవిందం’ తర్వాత మరోసారి ఈ జంట కలిసి నటిస్తుండటంతో ప్రేక్షకుల్లో ఆసక్తి మరింత పెరిగింది.
విడుదలైన మేకింగ్ వీడియోలో ముఖ్యంగా గుర్రపు స్వారీ సన్నివేశాలు ప్రత్యేక ఆకర్షణగా నిలిచాయి. సినిమాలో ‘రణబాలి’ పాత్ర అత్యంత పవర్ఫుల్గా ఉండబోతున్నట్లు గ్లింప్స్ ద్వారా అర్థమవుతోంది. ఈ పాత్ర కోసం విజయ్ దేవరకొండ నెలల తరబడి ప్రత్యేక శిక్షణ తీసుకున్నట్లు వీడియోలో చూపించారు. ముఖ్యంగా స్టాలియన్ జాతికి చెందిన అత్యంత వేగవంతమైన, మచ్చిక చేసుకోవడానికి కష్టమైన గుర్రాలతో ఆయన సాధన చేసిన దృశ్యాలు ప్రేక్షకులను ఆశ్చర్యానికి గురిచేస్తున్నాయి.
గుర్రపు స్వారీ సాధన సమయంలో విజయ్ పలుమార్లు గాయపడినట్లు వీడియోలో వెల్లడైంది. అయినప్పటికీ ఆయన వెనక్కి తగ్గకుండా పట్టుదలతో శిక్షణ పూర్తి చేసినట్లు చిత్రబృందం తెలిపింది. సినిమా పట్ల విజయ్ చూపుతున్న అంకితభావానికి ఇది నిదర్శనమని అభిమానులు సోషల్ మీడియాలో ప్రశంసలు కురిపిస్తున్నారు. ఒక పాత్ర కోసం ఇంతగా శ్రమించడం అరుదని సినీ విశ్లేషకులు అభిప్రాయపడుతున్నారు.
ఈ మేకింగ్ వీడియోలో విజువల్స్, యాక్షన్ సెటప్, భారీ నిర్మాణ విలువలు కూడా ప్రత్యేకంగా ఆకట్టుకుంటున్నాయి. యుద్ధ నేపథ్యంతో పాటు చారిత్రక శైలిలో సినిమా తెరకెక్కుతున్నట్లు సంకేతాలు కనిపిస్తున్నాయి. గుర్రపు స్వారీ, యాక్షన్, భావోద్వేగాలు కలగలిపిన ఈ చిత్రం విజయ్ కెరీర్లో అత్యంత ప్రతిష్ఠాత్మక ప్రాజెక్ట్గా నిలిచే అవకాశాలు కనిపిస్తున్నాయి.
విజయ్ దేవరకొండ గత కొన్ని చిత్రాల తర్వాత మళ్లీ బలమైన కమ్బ్యాక్ కోసం ప్రయత్నిస్తున్నారని సినీ వర్గాలు చెబుతున్నాయి. ఈ నేపథ్యంలో ‘రణబాలి’పై అభిమానులు భారీ ఆశలు పెట్టుకున్నారు. దర్శకుడు రాహుల్ సాంకృత్యన్ కూడా విభిన్నమైన కథలతో గుర్తింపు తెచ్చుకున్న దర్శకుడిగా పేరు సంపాదించడంతో ఈ కాంబినేషన్పై అంచనాలు పెరిగాయి.
ఇక మైత్రీ మూవీ మేకర్స్ నిర్మాణ విలువల విషయంలో ఎప్పుడూ రాజీ పడని సంస్థగా పేరుగాంచింది. భారీ స్థాయిలో రూపొందుతున్న ఈ సినిమా కోసం అత్యాధునిక సాంకేతిక పరిజ్ఞానాన్ని వినియోగిస్తున్నట్లు సమాచారం. పాన్ ఇండియా స్థాయిలో తెలుగు, తమిళ, హిందీ, కన్నడ, మలయాళ భాషల్లో చిత్రాన్ని విడుదల చేయాలని నిర్మాతలు భావిస్తున్నట్లు సినీ వర్గాల్లో చర్చ జరుగుతోంది.
