తెలంగాణ రాష్ట్ర రోడ్డు రవాణా సంస్థ (టీజీఎస్ఆర్టీసీ) బస్సుల్లో కనిపిస్తున్న ఓ కొత్త తరహా బోర్డు ప్రస్తుతం ప్రయాణికుల దృష్టిని ఆకర్షిస్తోంది. “పురుషులను గౌరవించడం మన సంప్రదాయం.. వారి కోసం కేటాయించిన సీట్లలో వారినే కూర్చోనిద్దాం” అనే సందేశంతో ఉన్న ఈ బోర్డులు కొన్ని ఆర్టీసీ బస్సుల్లో కనిపించడంతో దీనికి సంబంధించిన వీడియోలు, ఫొటోలు సామాజిక మాధ్యమాల్లో వైరల్గా మారాయి. బస్సుల్లో ప్రయాణించే పురుషులకు కేటాయించిన సీట్లను వారికి అందుబాటులో ఉంచాలనే ఉద్దేశంతో ఈ సందేశాన్ని ఏర్పాటు చేసినట్లు కనిపిస్తోంది.
అయితే ఈ బోర్డులు అధికారికంగా టీజీఎస్ఆర్టీసీ యాజమాన్యం ఏర్పాటు చేసిందా? లేదా ఆయా డిపోలకు చెందిన సిబ్బంది లేదా ఇతరులు ఏర్పాటు చేశారా? అనే అంశంపై ఇంకా స్పష్టత రావాల్సి ఉంది. అధికారికంగా ఈ బోర్డులపై సంస్థ నుంచి ఎలాంటి ప్రకటన వెలువడాల్సి ఉంది. ఇటీవల కొన్ని టీజీఎస్ఆర్టీసీ బస్సుల్లో కనిపించిన ఈ బోర్డుల వీడియోలు సోషల్ మీడియాలో విస్తృతంగా షేర్ అవుతున్నాయి. బస్సులో పురుషుల కోసం కేటాయించిన సీట్లను సూచిస్తూ, వాటిని సంబంధిత ప్రయాణికులకు అందుబాటులో ఉంచాలని సందేశం ఇవ్వడం చర్చకు దారితీసింది.
సాధారణంగా ప్రజా రవాణా వ్యవస్థలో సీట్ల కేటాయింపు విషయంలో మహిళలు, వృద్ధులు, దివ్యాంగులు, ఇతర ప్రత్యేక వర్గాలకు నిర్దిష్ట సీట్లు ఉంటాయి. అదే సమయంలో సాధారణ ప్రయాణికుల కోసం కూడా సీట్లు కేటాయిస్తారు. అయితే రద్దీ ఎక్కువగా ఉన్న సమయంలో ఎవరు ఏ సీటులో కూర్చోవాలి, ఎవరికి సీటు ఇవ్వాలి అనే అంశాలపై ప్రయాణికుల మధ్య తరచూ చర్చలు, వాదనలు చోటుచేసుకుంటుంటాయి.ఈ నేపథ్యంలో పురుషుల కోసం కేటాయించిన సీట్లలో వారినే కూర్చోనిద్దామంటూ బోర్డుపై సందేశం ఉండటం ఇప్పుడు ప్రత్యేక చర్చకు కారణమైంది.
తెలంగాణలో కాంగ్రెస్ ప్రభుత్వం అమలు చేస్తున్న ‘మహాలక్ష్మి’ పథకం కింద మహిళలకు ఉచిత బస్సు ప్రయాణ సౌకర్యం అందుబాటులోకి వచ్చిన విషయం తెలిసిందే. ఈ పథకం అమలులోకి వచ్చిన తర్వాత రాష్ట్రవ్యాప్తంగా ఆర్టీసీ బస్సుల్లో మహిళా ప్రయాణికుల సంఖ్య గణనీయంగా పెరిగినట్లు అధికారులు గతంలో వెల్లడించారు.
ఉచిత ప్రయాణ సౌకర్యం కారణంగా మహిళలు పెద్ద సంఖ్యలో ఆర్టీసీ బస్సులను వినియోగించుకుంటున్నారు. ఫలితంగా ముఖ్యంగా నగరాలు, పట్టణాలు, రద్దీ మార్గాల్లో నడిచే బస్సుల్లో ప్రయాణికుల సంఖ్య పెరిగింది. కొన్ని సమయాల్లో బస్సులు పూర్తిగా నిండిపోవడంతో సీట్ల కోసం ప్రయాణికులు ఇబ్బందులు ఎదుర్కొంటున్న పరిస్థితులు కనిపిస్తున్నాయి. ప్రయాణికుల రద్దీ పెరగడంతో సీట్ల కేటాయింపు అంశం కూడా తరచుగా చర్చకు వస్తోంది. ముఖ్యంగా టికెట్ కొనుగోలు చేసి ప్రయాణించే పురుషులు సీట్లు లభించక నిలబడే ప్రయాణం చేయాల్సి వస్తోందని కొందరు ప్రయాణికులు అభిప్రాయపడుతున్నారు.
మహిళలకు ఉచిత ప్రయాణం అందుబాటులోకి వచ్చిన తర్వాత బస్సుల్లో మహిళల సంఖ్య పెరగడం సహజమే. అయితే రద్దీ ఎక్కువగా ఉన్నప్పుడు పురుషుల కోసం కేటాయించిన సీట్లలో కూడా ఇతర ప్రయాణికులు కూర్చోవడం వల్ల కొందరు పురుషులకు సీట్లు దొరకడం లేదనే చర్చ జరుగుతోంది.
ప్రత్యేకించి ప్రయాణికుల రద్దీ ఎక్కువగా ఉండే ఉదయం, సాయంత్రం సమయాల్లో ఈ సమస్య ఎక్కువగా కనిపిస్తోందని పలువురు చెబుతున్నారు. టికెట్లు కొనుగోలు చేసి ప్రయాణించే పురుషులకు కూడా కూర్చునే హక్కు ఉందని, వారికి కేటాయించిన సీట్లను ఖాళీగా ఉంచాలని కొందరు అభిప్రాయపడుతున్నారు.మరోవైపు బస్సుల్లో అందుబాటులో ఉన్న సీట్లను ప్రయాణికులు పరస్పర అవగాహనతో ఉపయోగించుకోవాలని మరికొందరు సూచిస్తున్నారు. మహిళలు, పురుషులు అనే తేడా లేకుండా సీట్ల కేటాయింపుపై స్పష్టమైన నిబంధనలు పాటించాల్సిన అవసరం ఉందని అభిప్రాయాలు వ్యక్తమవుతున్నాయి.
ఈ నేపథ్యంలో బస్సుల్లో కనిపించిన “పురుషులను గౌరవించడం మన సంప్రదాయం.. వారి కోసం కేటాయించిన సీట్లలో వారినే కూర్చోనిద్దాం” అనే సందేశం ఆసక్తిని రేకెత్తించింది. సాధారణంగా ప్రజా రవాణా బస్సుల్లో మహిళలకు, వృద్ధులకు, దివ్యాంగులకు కేటాయించిన సీట్ల గురించి ప్రత్యేక సూచనలు కనిపిస్తుంటాయి. కానీ పురుషుల సీట్లను ఉద్దేశించి ఇలాంటి సందేశం కనిపించడం మాత్రం కొత్తగా ఉందని ప్రయాణికులు చెబుతున్నారు.ఈ బోర్డు వెనుక ఉద్దేశం పురుషుల కోసం కేటాయించిన సీట్లను రక్షించడం మాత్రమేనా? లేక ప్రయాణికుల మధ్య పరస్పర గౌరవం, సామాజిక బాధ్యతను పెంచడమా? అనే అంశంపై కూడా సోషల్ మీడియాలో చర్చ జరుగుతోంది.
అందుబాటులో ఉన్న సమాచారం ప్రకారం మేడ్చల్, బాలానగర్ డిపోలకు చెందిన కొన్ని బస్సుల్లో ఈ తరహా బోర్డులు కనిపించినట్లు తెలుస్తోంది. అయితే ఇవి అధికారికంగా టీజీఎస్ఆర్టీసీ యాజమాన్యం ఏర్పాటు చేసినవేనా? లేక స్థానికంగా ఏర్పాటు చేసినవా? అనే విషయం ఇంకా నిర్ధారణ కావాల్సి ఉంది.ఒకవేళ సంస్థ అధికారికంగా ఈ బోర్డులను ఏర్పాటు చేసి ఉంటే, వాటి వెనుక ఉద్దేశం ఏమిటి? అన్ని డిపోలకు ఈ సందేశాన్ని విస్తరించనున్నారా? అనే ప్రశ్నలు కూడా తలెత్తుతున్నాయి. దీనిపై ఆర్టీసీ నుంచి అధికారిక వివరణ వస్తేనే పూర్తి స్పష్టత వచ్చే అవకాశం ఉంది.
