టాలీవుడ్ యంగ్ టైగర్ ఎన్టీఆర్ హీరోగా, సెన్సేషనల్ దర్శకుడు ప్రశాంత్ నీల్ తెరకెక్కిస్తున్న భారీ పాన్ ఇండియా ప్రాజెక్ట్ ‘డ్రాగన్’పై అభిమానుల్లో నెలకొన్న అంచనాలు మరోసారి స్పష్టమయ్యాయి. ఇటీవల విడుదలైన ‘డ్రాగన్’ ఫస్ట్ గ్లింప్స్ సోషల్ మీడియాలో సంచలనం సృష్టించగా, థియేటర్ల వద్ద అభిమానులు చేసిన హంగామా ఇప్పుడు సినీ, రాజకీయ వర్గాల్లో చర్చనీయాంశంగా మారింది.
ఎన్టీఆర్ పుట్టినరోజు సందర్భంగా విడుదలైన ఈ గ్లింప్స్ను ఐదు భాషల్లో ఒకేసారి విడుదల చేశారు. హైదరాబాద్ నగరంలోని పలు థియేటర్లలో ప్రత్యేక స్క్రీనింగ్స్ ఏర్పాటు చేయగా, బాలానగర్లోని విమల్ థియేటర్ వద్ద అభిమానుల సందడి మిన్నంటింది. భారీ కటౌట్లు, పాలాభిషేకాలు, బాణసంచా కాల్పులు, డీజే సౌండ్లతో థియేటర్ పరిసరాలు పండుగ వాతావరణాన్ని తలపించాయి.
తమ అభిమాన హీరో స్క్రీన్పై కనిపించగానే ఫ్యాన్స్ చేసిన అరుపులు, విజిల్స్తో థియేటర్లు దద్దరిల్లాయి. ముఖ్యంగా ఎన్టీఆర్ ఎంట్రీ షాట్స్, ప్రశాంత్ నీల్ స్టైల్ మాస్ విజువల్స్ అభిమానులను ఉర్రూతలూగించాయి. సోషల్ మీడియాలో ఇప్పటికే ఈ గ్లింప్స్ మిలియన్ల వ్యూస్ దాటుతుండగా, అభిమానులు దీన్ని మరో ఇండస్ట్రీ హిట్కు సంకేతంగా అభివర్ణిస్తున్నారు.
అయితే ఈ వేడుకల్లో అభిమానులు చేసిన “సీఎం.. సీఎం..” నినాదాలు ఇప్పుడు కొత్త చర్చకు దారితీశాయి. థియేటర్ల వద్ద భారీగా గుమికూడిన అభిమానులు ఎన్టీఆర్కు పుట్టినరోజు శుభాకాంక్షలు తెలుపుతూ, ఆయన రాజకీయాల్లోకి రావాలంటూ నినాదాలు చేశారు. ప్రస్తుతం ఈ వీడియోలు సోషల్ మీడియాలో వైరల్ అవుతున్నాయి.
గతంలో తెలుగుదేశం పార్టీ తరఫున ఎన్నికల ప్రచారంలో పాల్గొన్న ఎన్టీఆర్, ఆ తర్వాత రాజకీయాలకు దూరంగా ఉంటూ పూర్తిగా సినిమాలపైనే దృష్టి సారించారు. అయితే అభిమానుల్లో మాత్రం ఆయన రాజకీయాల్లోకి రావాలనే ఆకాంక్ష ఎప్పటికప్పుడు కనిపిస్తూనే ఉంది.
ప్రత్యేకించి యువతలో ఎన్టీఆర్కు ఉన్న క్రేజ్, ఆయన మాస్ ఇమేజ్, వాక్చాతుర్యం, కుటుంబ రాజకీయ వారసత్వం కారణంగా తరచూ రాజకీయ ఎంట్రీపై ఊహాగానాలు వినిపిస్తుంటాయి. ఇప్పుడు థియేటర్ల వద్ద వినిపించిన సీఎం నినాదాలు ఆ చర్చను మరింత వేడెక్కించాయి.
ఇటీవల తమిళనాడులో నటుడు విజయ్ రాజకీయాల్లోకి వచ్చి ఘనవిజయం సాధించడంతో దక్షిణాది సినీ రాజకీయాలపై మళ్లీ చర్చ మొదలైంది. తమిళనాడులో విజయ్కు ఉన్న మాస్ ఫాలోయింగ్ తరహాలో తెలుగు రాష్ట్రాల్లో ఎన్టీఆర్కే అపారమైన ప్రజాదరణ ఉందనే అభిప్రాయాలు సోషల్ మీడియాలో వ్యక్తమవుతున్నాయి.
ఈ నేపథ్యంలో “ఎన్టీఆర్ కూడా భవిష్యత్తులో రాజకీయాల్లోకి వస్తారా?” అనే ప్రశ్న మరోసారి చర్చకు వచ్చింది. అభిమానులు మాత్రం ఆయనను భవిష్యత్తు నాయకుడిగా చూస్తున్నట్లు సోషల్ మీడియా పోస్టుల్లో కనిపిస్తోంది. ఇక సినిమా విషయానికి వస్తే, ‘కేజీఎఫ్’, ‘సలార్’ వంటి భారీ హిట్ల తర్వాత ప్రశాంత్ నీల్ తెరకెక్కిస్తున్న చిత్రం కావడంతో ‘డ్రాగన్’పై దేశవ్యాప్తంగా భారీ అంచనాలు నెలకొన్నాయి. ఎన్టీఆర్ను పూర్తిస్థాయి మాస్ అవతార్లో చూపించబోతున్నారని సినీ వర్గాలు చెబుతున్నాయి.
గ్లింప్స్లో కనిపించిన యాక్షన్ విజువల్స్, డార్క్ టోన్, ఎన్టీఆర్ స్క్రీన్ ప్రెజెన్స్ అభిమానులను విపరీతంగా ఆకట్టుకున్నాయి. పాన్ ఇండియా స్థాయిలో ఈ సినిమా భారీ వసూళ్లు సాధించే అవకాశాలు ఉన్నాయని ట్రేడ్ వర్గాలు అంచనా వేస్తున్నాయి. సినిమా విడుదలకు ఇంకా సమయం ఉన్నప్పటికీ, ఇప్పటినుంచే ‘డ్రాగన్’ సోషల్ మీడియాలో ట్రెండింగ్ అవుతుండటం ఈ ప్రాజెక్ట్పై ఉన్న హైప్కు నిదర్శనంగా భావిస్తున్నారు.
