విశ్వనగరంగా విశాఖపట్నం :ఏపీ సీఎం చంద్రబాబు నాయుడు

అభివృద్ధి విషయంలో ఒక్క అమరావతిపైనే శ్రద్ధ పెట్టడం లేదని, విశాఖను విశ్వనగరంగా తీర్చిదిద్దే దిశగా సమగ్ర ప్రణాళికలతో ముందుకు వెళ్తున్నామని ఆంధ్రప్రదేశ్ ముఖ్యమంత్రి చంద్రబాబు నాయుడు స్పష్టం చేశారు. రాజధాని ప్రాంతంలో కిమ్స్‌ ఆసుపత్రి, వైద్య విశ్వవిద్యాలయం నిర్మాణానికి భూమి పూజ చేసిన అనంతరం ఏర్పాటు చేసిన సభలో ఆయన రాష్ట్ర అభివృద్ధి దిశ, భవిష్యత్ ప్రణాళికలపై విస్తృతంగా మాట్లాడారు.

రాష్ట్రాన్ని సమగ్రంగా అభివృద్ధి చేయాలన్న దృఢ సంకల్పంతో ప్రభుత్వం ముందుకు వెళ్తోందని సీఎం అన్నారు. ఒక ప్రాంతానికే పరిమితం కాకుండా అన్ని ప్రాంతాలను సమానంగా అభివృద్ధి చేయడమే తమ విధానమని ఆయన స్పష్టం చేశారు. రాయలసీమ, కోస్తా, ఉత్తరాంధ్ర ప్రాంతాలను ప్రత్యేక హబ్‌లుగా అభివృద్ధి చేస్తూ సమగ్ర ఆర్థిక వ్యవస్థను నిర్మిస్తున్నట్లు వివరించారు.

రాయలసీమను ‘రతనాల సీమ’గా మార్చే దిశగా ఇప్పటికే పలు పరిశ్రమలు వస్తున్నాయని సీఎం తెలిపారు. అనంతపురాన్ని ఏరోస్పేస్ హబ్‌గా అభివృద్ధి చేయడమే కాకుండా, తిరుపతిలో ఏరోస్పేస్ సిటీ ఏర్పాటు చేయడం ద్వారా అధునాతన పరిశ్రమలకు కేంద్రంగా మార్చుతున్నామని చెప్పారు. కర్నూలులో డ్రోన్ సిటీ ఏర్పాటు కాబోతుందని, ఇది భవిష్యత్ టెక్నాలజీ రంగానికి కీలక కేంద్రంగా మారుతుందని ఆయన అన్నారు.

ఇక శ్రీసిటీ ఇప్పటికే దేశంలోనే ఒక ప్రధాన పారిశ్రామిక కేంద్రంగా అభివృద్ధి చెందిందని సీఎం పేర్కొన్నారు. అక్కడ పెట్టుబడులు పెరుగుతున్నాయని, మరిన్ని గ్లోబల్ కంపెనీలు రాబోతున్నాయని ఆయన తెలిపారు. రాష్ట్రంలో పరిశ్రమలకు అవసరమైన అనుమతులు వేగంగా ఇవ్వడానికి ప్రభుత్వం సిద్ధంగా ఉందని స్పష్టం చేశారు.

రాజధాని ప్రాంత అభివృద్ధిపై మాట్లాడుతూ, కిమ్స్‌ ఆసుపత్రి నిర్మాణానికి భూమి పూజ చేసిన విషయాన్ని ప్రస్తావించారు. 2027 మే 13 నాటికి ఆసుపత్రిని ప్రారంభిస్తామని ఆయన ప్రకటించారు. వైద్య విద్యను మరింత ఆధునికంగా తీర్చిదిద్దేందుకు వైద్య విశ్వవిద్యాలయం కూడా ఏర్పాటు చేయనున్నట్లు తెలిపారు.

విశాఖపట్నం అభివృద్ధి గురించి ప్రత్యేకంగా ప్రస్తావించిన సీఎం, 2028 ఆగస్టు 15 కంటే ముందే గూగుల్ తన కార్యకలాపాలను ప్రారంభిస్తుందని తెలిపారు. విశాఖను విశ్వనగరంగా తీర్చిదిద్దే దిశగా అనేక అంతర్జాతీయ సంస్థలు ముందుకు వస్తున్నాయని ఆయన చెప్పారు. అలాగే ఆర్సెల్లార్ మిత్తల్ సంస్థ ఫేజ్-1 పనులను 2028 డిసెంబరులోపు పూర్తి చేయాలని ఆదేశాలు ఇచ్చినట్లు వెల్లడించారు.

పర్యాటక రంగ అభివృద్ధిపై మాట్లాడుతూ, విదేశాలకు వెళ్లే బదులు దేశంలోనే ఉన్న అద్భుతమైన పర్యాటక ప్రదేశాలను సందర్శించాలని సీఎం సూచించారు. అరకు, పాపికొండలు, గండికోట వంటి ప్రాంతాలను ప్రపంచ స్థాయి టూరిజం కేంద్రాలుగా అభివృద్ధి చేస్తున్నట్లు తెలిపారు. సూర్యలంకను గోవాను మించిన టూరిజం కేంద్రంగా తీర్చిదిద్దే దిశగా చర్యలు తీసుకుంటున్నట్లు చెప్పారు.

ఈ కార్యక్రమంలో కేంద్రమంత్రి పెమ్మసాని చంద్రశేఖర్ తో పాటు పలువురు ప్రజాప్రతినిధులు, అధికారులు పాల్గొన్నారు.