నటుడు విజయ్ నేతృత్వంలోని తమిళగ వెట్రి కళగం (టీవీకే) పార్టీ అసెంబ్లీ ఎన్నికల్లో అతిపెద్ద పార్టీగా అవతరించినప్పటికీ, ఇప్పటివరకు ప్రభుత్వం ఏర్పాటు చేయడానికి గవర్నర్ నుంచి ఆహ్వానం రాకపోవడం రాజకీయ చర్చకు దారితీస్తోంది. ఈ నేపథ్యంలో సినీ నటుడు, రచయిత పోసాని కృష్ణమురళి చేసిన వ్యాఖ్యలు ఇప్పుడు వైరల్ అవుతున్నాయి.
విజయ్కు ప్రభుత్వం ఏర్పాటు చేసే అవకాశం ఇవ్వకపోవడాన్ని తీవ్రంగా తప్పుబట్టిన పోసాని, ఆయన చుట్టూ పెద్ద రాజకీయ కుట్ర జరుగుతోందని ఆరోపించారు. విజయ్ను “రాజకీయ అభిమన్యుడిని” చేయాలని కొందరు ప్రయత్నిస్తున్నారని ఆవేదన వ్యక్తం చేశారు.
మీడియాతో మాట్లాడుతూ పోసాని పలు కీలక వ్యాఖ్యలు చేశారు. అసెంబ్లీ ఎన్నికల్లో టీవీకే పార్టీ అతిపెద్ద పార్టీగా అవతరించిన తర్వాత రాజ్యాంగ సంప్రదాయం ప్రకారం ముందుగా ప్రభుత్వం ఏర్పాటు చేసే అవకాశం ఇవ్వాల్సిందని అన్నారు. కానీ అలాకాకుండా మెజారిటీ నిరూపించుకోవాలని గవర్నర్ ముందుగానే షరతులు పెట్టడం పక్షపాత ధోరణిగా కనిపిస్తోందని అభిప్రాయపడ్డారు.
“ఇది సాధారణ రాజకీయ ప్రక్రియలా కనిపించడం లేదు. విజయ్ను అడ్డుకోవడానికి జరుగుతున్న పెద్ద ప్లాన్లో భాగంగా అనిపిస్తోంది. ప్రజలు ఇచ్చిన తీర్పును గౌరవించకుండా ఇలా వ్యవహరించడం సరైంది కాదు” అని పోసాని మండిపడ్డారు.
విజయ్తో తనకు చాలా ఏళ్ల పరిచయం ఉందని కూడా ఆయన గుర్తుచేశారు. “విజయ్ నాకు 1996 నుంచే తెలుసు. ఆయన తండ్రి ఎస్.ఎ. చంద్రశేఖర్తో కూడా నాకు మంచి పరిచయం ఉంది. విజయ్ ఎప్పుడూ అధికారం కోసం పాకులాడే వ్యక్తి కాదు. ఎంతో ప్రశాంతంగా, సంయమనంతో వ్యవహరిస్తాడు” అని ప్రశంసించారు.
రాజకీయాల్లోకి వచ్చిన తర్వాత కూడా విజయ్ తన వ్యక్తిత్వాన్ని మార్చుకోలేదని, ఎన్ని ఒత్తిడులు వచ్చినా ఆలోచించి మాట్లాడే వ్యక్తి అని పోసాని పేర్కొన్నారు. తమిళనాడులో ప్రస్తుతం ఆయనను ఒంటరివాడిని చేయడానికి కొన్ని శక్తులు ప్రయత్నిస్తున్నాయని ఆరోపించారు.
“ప్రజలు ఇచ్చిన అవకాశాన్ని అడ్డుకోవడం ప్రజాస్వామ్య విరుద్ధం. అతిపెద్ద పార్టీగా నిలిచిన తర్వాత కూడా అవకాశం ఇవ్వకపోవడం సరైన పద్ధతి కాదు. విజయ్పై జరుగుతున్నది కేవలం రాజకీయ పోటీ కాదు.. ఒక రకమైన వ్యూహాత్మక నిరోధం” అని ఆయన వ్యాఖ్యానించారు.
తమిళనాడులో ఈసారి ఎన్నికల ఫలితాలు రాష్ట్ర రాజకీయాలను పూర్తిగా మార్చేశాయి. తొలి ఎన్నికల్లోనే టీవీకే పార్టీ 108 స్థానాలు గెలుచుకుని అతిపెద్ద పార్టీగా నిలవడం సంచలనంగా మారింది. యువత, సినీ అభిమానులు, పట్టణ ఓటర్ల మద్దతుతో విజయ్ రాజకీయాల్లో భారీ ఎంట్రీ ఇచ్చారని విశ్లేషకులు చెబుతున్నారు.
అయితే పూర్తి మెజారిటీకి ఇంకా కొన్ని స్థానాలు తక్కువగా ఉండటంతో ప్రభుత్వం ఏర్పాటు విషయంలో ఉత్కంఠ కొనసాగుతోంది. ఇప్పటికే కాంగ్రెస్ పార్టీ విజయ్కు మద్దతు ప్రకటించింది. మరోవైపు సీపీఐ, వీసీకే, డీఎంకే వంటి పార్టీలు కూడా టీవీకేకు తొలి అవకాశం ఇవ్వాలని గవర్నర్ను కోరాయి.
ఇప్పటికే కమల్ హాసన్, విశాల్ వంటి సినీ ప్రముఖులు కూడా విజయ్కు మద్దతుగా స్పందించగా, ఇప్పుడు పోసాని కృష్ణమురళి చేసిన వ్యాఖ్యలు మరింత చర్చకు దారితీశాయి. ముఖ్యంగా “రాజకీయ అభిమన్యుడు” అనే వ్యాఖ్య సోషల్ మీడియాలో వైరల్గా మారింది.
సోషల్ మీడియాలో టీవీకే కార్యకర్తలు, విజయ్ అభిమానులు పెద్ద ఎత్తున స్పందిస్తున్నారు. ప్రజా తీర్పును గౌరవించాలని, అతిపెద్ద పార్టీకి అవకాశం ఇవ్వాలని డిమాండ్ చేస్తున్నారు. ఇతర రాజకీయ పార్టీలు కూడా పరిణామాలను నిశితంగా గమనిస్తున్నాయి.
