ఆంధ్రప్రదేశ్ ఎక్సైజ్ శాఖలో పనిచేస్తున్న పోలీసులకు రాష్ట్ర ప్రభుత్వం ఊరట కల్పించింది. బార్లు మూసివేసిన తర్వాత అర్ధరాత్రి సమయంలో ఫొటోలు తీసి యాప్లో అప్లోడ్ చేయాల్సిన నిబంధనను సడలిస్తూ ప్రభుత్వం తాజా నిర్ణయం తీసుకుంది. ఇటీవల జరిగిన దుర్ఘటన నేపథ్యంలో ఈ మార్పులు అమలు చేశారు.
ఈ నిర్ణయానికి కారణమైన విషాద ఘటన విశాఖపట్నంలో చోటుచేసుకుంది. సీతమ్మధార ఎక్సైజ్ పోలీస్ స్టేషన్లో హెడ్ కానిస్టేబుల్గా విధులు నిర్వహిస్తున్న సింహాచలం నాయుడు, తన కర్తవ్య నిర్వహణలో భాగంగా గురువారం అర్ధరాత్రి బార్ల తనిఖీ చేపట్టారు. విధి నిర్వాహణలో భాగంగా బార్లు మూసివేసిన తర్వాత వాటి ఫొటోలు తీసి యాప్లో అప్లోడ్ చేశారు. విధి పూర్తి చేసుకుని ఇంటికి తిరిగి వెళ్తున్న సమయంలో అనూహ్యంగా జరిగిన ప్రమాదం ఆయన ప్రాణాలను బలిగొంది.
తాటిచెట్లపాలెం వద్ద వేగంగా వచ్చిన బైక్ ఆయనను ఢీకొట్టింది. ఈ ప్రమాదంలో తీవ్రంగా గాయపడిన సింహాచలం నాయుడిని వెంటనే ఆసుపత్రికి తరలించినప్పటికీ, చికిత్స పొందుతూ ఆయన మరణించారు. ఈ ఘటన ఎక్సైజ్ శాఖలోనే కాకుండా రాష్ట్రవ్యాప్తంగా విషాదాన్ని నింపింది.
ప్రమాదానికి కారణమైన బైక్పై ఉన్న ఇద్దరు యువకులు మద్యం మత్తులో ఉన్నట్లు పోలీసులు గుర్తించారు. మద్యం సేవించి వాహనం నడపడం ఎంత ప్రమాదకరమో ఈ ఘటన మరోసారి స్పష్టం చేసింది. ఈ కేసులో సంబంధిత యువకులపై పోలీసులు చర్యలు చేపట్టినట్లు సమాచారం.
ఈ ఘటన తర్వాత ఎక్సైజ్ పోలీసుల పని విధానాలపై చర్చ మొదలైంది. ముఖ్యంగా అర్ధరాత్రి సమయంలో విధులు నిర్వహించడం, దూర ప్రాంతాల్లో తనిఖీలు చేయడం వంటి అంశాలు సిబ్బందికి ప్రమాదకరంగా మారుతున్నాయని ఉద్యోగ సంఘాలు ప్రభుత్వ దృష్టికి తీసుకెళ్లాయి. ఈ నేపథ్యంలో అర్ధరాత్రి ఫొటోలు తీసి యాప్లో అప్లోడ్ చేయాల్సిన నిబంధనను సడలించాలని వారు కోరారు.
ఉద్యోగ సంఘాల విజ్ఞప్తిని పరిగణలోకి తీసుకున్న ప్రభుత్వం తక్షణమే స్పందించింది. సిబ్బంది భద్రతను దృష్టిలో ఉంచుకుని ఈ నిబంధనలో మార్పులు చేస్తూ సంబంధిత అధికారులకు ఆదేశాలు జారీ చేసింది. ఇకపై ఈ ప్రక్రియలో కొంత సడలింపు ఇవ్వడంతో ఎక్సైజ్ పోలీసులకు ఉపశమనం లభించనుంది.
