ఆంధ్రప్రదేశ్ ముఖ్యమంత్రి నారా చంద్రబాబు నాయుడు రేపు ముంబైలో పర్యటించనున్నారు. ఈ సందర్భంగా ప్రముఖ వాణిజ్య పత్రిక The Economic Times ప్రకటించిన ‘బిజినెస్ రిఫార్మర్ ఆఫ్ ది ఇయర్’ అవార్డును ఆయన అందుకోనున్నారు. ఈ అవార్డు ఆయన పరిపాలనలో తీసుకొచ్చిన సంస్కరణలకు జాతీయ స్థాయిలో లభించిన గౌరవం.
ముంబైలో జరగనున్న 26వ కార్పొరేట్ ఎక్స్లెన్స్ అవార్డుల ప్రదానోత్సవం ఎంతో ప్రతిష్టాత్మకంగా నిర్వహించనున్నారు. ఈ వేడుకకు కేంద్ర ఆర్థిక శాఖ మంత్రి నిర్మలా సీతారామన్ ముఖ్య అతిథిగా హాజరుకానున్నారు. ఈ కార్యక్రమంలో చంద్రబాబును ‘గెస్ట్ ఆఫ్ హానర్’గా ప్రత్యేకంగా ఆహ్వానించడం ఆయనకు లభించిన గౌరవాన్ని మరింత పెంచుతోంది.
పరిపాలనలో తీసుకొచ్చిన విప్లవాత్మక మార్పులు, పెట్టుబడులను ఆకర్షించడంలో చూపిన చొరవ, పారిశ్రామిక అభివృద్ధికి అందిస్తున్న ప్రోత్సాహం వంటి అంశాలకుగాను ఈ అవార్డు ఆయనకు దక్కింది. ముఖ్యంగా రాష్ట్ర ఆర్థిక వ్యవస్థను బలోపేతం చేయడంలో తీసుకున్న నిర్ణయాలు జాతీయ స్థాయిలో ప్రశంసలు అందుకున్నాయి.
ఈ కార్యక్రమంలో దేశవ్యాప్తంగా ఉన్న ప్రముఖ పారిశ్రామికవేత్తలు, వ్యాపారవేత్తలు, ఆర్థిక నిపుణులు పాల్గొననున్నారు. భారత ఆర్థిక ప్రగతిలో కీలక పాత్ర పోషిస్తున్న ప్రముఖుల సమక్షంలో ఈ అవార్డు అందుకోవడం చంద్రబాబుకు ప్రత్యేకం.
ఈ పర్యటనకు సంబంధించి అధికారులు అన్ని ఏర్పాట్లు పూర్తి చేశారు. భద్రతా ఏర్పాట్లతో పాటు, కార్యక్రమంలో సీఎం పాల్గొనే అంశాలపై సమగ్ర ప్రణాళిక సిద్ధం చేశారు. ముంబై పర్యటనలో ఆయన పలువురు పారిశ్రామికవేత్తలతో కూడా సమావేశమయ్యే అవకాశముందని సమాచారం.
ఈ అవార్డు ద్వారా ఆంధ్రప్రదేశ్ రాష్ట్రానికి కూడా గుర్తింపు లభిస్తోందని ప్రభుత్వ వర్గాలు పేర్కొంటున్నాయి. రాష్ట్రంలో అమలు చేస్తున్న అభివృద్ధి కార్యక్రమాలు, పెట్టుబడులకు అనుకూల వాతావరణం సృష్టించడంలో ప్రభుత్వం తీసుకుంటున్న చర్యలు జాతీయ స్థాయిలో ప్రశంసలు పొందుతున్నాయని అధికారులు తెలిపారు.
ఇలాంటి అవార్డులు రాష్ట్రానికి పెట్టుబడులను ఆకర్షించడంలో కూడా కీలక పాత్ర పోషిస్తాయి. అంతర్జాతీయ, జాతీయ స్థాయిలో రాష్ట్ర ప్రతిష్టను పెంచేందుకు ఇవి ఉపయోగపడతాయని వారు చెబుతున్నారు.
