తెలంగాణ పర్యాటక, సాంస్కృతిక, అబ్కారీ శాఖల మంత్రి జుపల్లి కృష్ణారావు తన సరళ స్వభావాన్ని మరోసారి చాటుకున్నారు. నగరంలోని మెట్రో రైలులో సామాన్య ప్రయాణికుడిలా ప్రయాణించి, ప్రయాణీకులందరినీ ఆశ్చర్యానికి గురిచేశారు. సాధారణంగా ఉన్నత పదవుల్లో ఉన్న నాయకులు ప్రోటోకాల్స్కు కట్టుబడి ప్రత్యేక వాహనాల్లో ప్రయాణిస్తుంటారు. అయితే జూపల్లి కృష్ణారావు మాత్రం వాటికి భిన్నంగా, ఎలాంటి ఆర్భాటం లేకుండా మెట్రో ప్రయాణం చేయడం విశేషం.
నగరంలోని ఒక ప్రైవేట్ కార్యక్రమానికి హాజరయ్యేందుకు ఎర్రమంజిల్ మెట్రోస్టేషన్ నుంచి మియాపూర్ మెట్రో స్టేషన్ వరకు ప్రయాణించారు. స్టేషన్కు చేరుకున్న వెంటనే మంత్రి స్వయంగా టికెట్ తీసుకుని, సాధారణ ప్రయాణికుల మాదిరిగానే ప్లాట్ఫాం మీదకు వెళ్లారు. ఆయన వద్ద ఎలాంటి ప్రత్యేక ఏర్పాట్లు లేకపోవడం అక్కడి ప్రయాణికులను ఆశ్చర్యనికి గురిచేసింది. ఇది మంత్రి మంచి తనానికి నిదర్శనంగా నిలిచింది.
రైలు ప్రయాణించే సమయంలో రద్దీ ఎక్కువగా ఉండటంతో సీటు కోసం ప్రయత్నించకుండా, ఇతరుల్లాగే నిలబడి ప్రయాణించారు. ఇది చూసిన ప్రజలు మొదట ఆయనను గుర్తించలేకపోయినా, తర్వాత గుర్తించి ఆశ్చర్యానికి గురయ్యారు. కొంతమంది మంత్రులు అప్పుడప్పుడు ఇలా ప్రజలతో మమేకమైన ప్రయాణించడం అరుదుగా కనిపించే విషయం.
ప్రయాణ సమయంలో మంత్రి ఇతర ప్రయాణికులతో ముచ్చటిస్తూ, వారి అనుభవాలను అడిగి తెలుసుకున్నారు. మెట్రోలో అందిస్తున్న సౌకర్యాలు, సేవలపై ప్రజల అభిప్రాయాలను తెలుసుకున్నారు. దీని ద్వారా ప్రజల సమస్యలను ప్రత్యక్షంగా గ్రహించేందుకు ఆయన ప్రయత్నించారు. ఇది ప్రజాప్రతినిధిగా ఆయనకు ఉన్న బాధ్యతను ప్రతిబింబిస్తుంది.
మెట్రో ప్రయాణంపై స్పందించిన మంత్రి, నగర ట్రాఫిక్ సమస్యలను తగ్గించడంలో మెట్రో కీలక పాత్ర పోషిస్తోందని అన్నారు. వేగంగా, సౌకర్యవంతంగా గమ్యస్థానాలకు చేరుకునే అవకాశాన్ని మెట్రో అందిస్తోందని పేర్కొన్నారు. ప్రజలు ఎక్కువగా మెట్రో సేవలను వినియోగించుకోవాలని సూచించారు.
ప్రస్తుతం నగరాల్లో ట్రాఫిక్ సమస్యలు రోజురోజుకూ పెరుగుతున్న నేపథ్యంలో, మెట్రో వంటి ప్రజా రవాణా వ్యవస్థలు ఎంతో ఉపయుక్తంగా మారుతున్నాయి. ఈ నేపథ్యంలో మంత్రి స్వయంగా మెట్రోలో ప్రయాణించడం ప్రజలకు ఒక మంచి సందేశంగా మారింది. నాయకులు ప్రజలతో కలిసిమెలిసి ఉండటం ఎంత ముఖ్యమో ఈ ఘటన మరోసారి చూపించింది.
