- అమెరికా, ఇజ్రాయెల్పై ముస్లిం దేశాలన్నీ ఏకం కావాలని పిలుపు
- ఈ దేశాలే ముస్లీం దేశాలకు నిజమైన శత్రువులన్న సుప్రీం లీడర్
మధ్యప్రాచ్యంలో అమెరికా, ఇజ్రాయెల్తో ఇరాన్కు కొనసాగుతున్న తీవ్ర ఉద్రిక్తతల నేపథ్యంలో ఇరాన్ సుప్రీం లీడర్ అయతొల్లా ముజ్తబా ఖమేనీ కీలక వ్యాఖ్యలు చేశారు. అమెరికా, ఇజ్రాయెల్కు వ్యతిరేకంగా ముస్లిం దేశాలన్నీ ఐక్యంగా నిలవాలని ఆయన పిలుపునిచ్చారు. ముఖ్యంగా పశ్చిమ ఆసియా, గల్ఫ్ ప్రాంతంలోని దేశాల పాలకులు తమకు ఎదురవుతున్న సవాళ్లను గుర్తించి, పరస్పర విభేదాలను పక్కనపెట్టి ఐక్యంగా వ్యవహరించాలని సూచించారు. ఇస్లామిక్ దేశాల మధ్య విభజన తమ ప్రత్యర్థులకు ప్రయోజనం చేకూరుస్తుందని ఆయన పేర్కొన్నారు.
ఇస్లామిక్ యూనిటీ వీక్ సందర్భంగా వెలువరించిన సందేశంలో ముజ్తబా ఖమేనీ ఈ వ్యాఖ్యలు చేసినట్లు అంతర్జాతీయ వార్తా సంస్థలు వెల్లడించాయి. ముస్లిం దేశాల పాలకులు తమ ‘నిజమైన శత్రువులు’ ఎవరో గుర్తించాలని, వారి వ్యూహాలను అర్థం చేసుకుని ఎదుర్కొనేందుకు సమష్టిగా ముందుకు సాగాలని ఆయన సూచించినట్లు రాయిటర్స్ నివేదించింది. అమెరికా, ఇజ్రాయెల్ను ఇస్లామిక్ దేశాలకు ప్రధాన ప్రత్యర్థులుగా ఆయన అభివర్ణించినట్లు సమాచారం.
ముస్లిం ప్రపంచం ఐక్యంగా ఉంటే పాలస్తీనా ప్రజల పరిస్థితి ఇంతకాలం ఇలాగే కొనసాగేదా? అనే ప్రశ్నను కూడా ముజ్తబా ఖమేనీ లేవనెత్తారు. పశ్చిమాసియా, గల్ఫ్ ప్రాంతాల్లోని దేశాలు పరస్పర సహకారాన్ని పెంచుకోవాలని ఆయన కోరారు. ముస్లిం దేశాల మధ్య విభేదాలు, అంతర్గత ఘర్షణలు బాహ్య శక్తులకు అనుకూలంగా మారుతున్నాయని ఆయన అభిప్రాయపడ్డారు. ఈ నేపథ్యంలో తమ మధ్య ఉన్న రాజకీయ, వ్యూహాత్మక విభేదాలను అధిగమించి ఉమ్మడి ప్రయోజనాల కోసం కలిసి పనిచేయాలని సూచించారు.
ఇరాన్ సుప్రీం లీడర్ నుంచి ఈ సందేశం వెలువడిన సమయం కూడా అత్యంత ప్రాధాన్యత సంతరించుకుంది. అమెరికా, ఇరాన్ మధ్య మరోసారి సైనిక ఉద్రిక్తతలు తీవ్రరూపం దాల్చాయి. ఆగస్టు 30న అమెరికా దళాలు హోర్ముజ్ జలసంధిలోని లారక్ ద్వీపంపై ఇరాన్కు చెందిన రెండు క్షిపణి ప్రయోగ వేదికలపై దాడులు చేసినట్లు రాయిటర్స్ వెల్లడించింది. దీనికి ప్రతిస్పందనగా ఇరాన్ జోర్డాన్లోని అమెరికా సైనిక స్థావరాలను లక్ష్యంగా చేసుకుని బాలిస్టిక్ క్షిపణులను ప్రయోగించింది. దీంతో ఇప్పటికే ఉద్రిక్తంగా ఉన్న పరిస్థితులు మరింత ఆందోళనకరంగా మారాయి.
హోర్ముజ్ జలసంధి విషయంలోనూ ఇరాన్, అమెరికా మధ్య తీవ్ర విభేదాలు కొనసాగుతున్నాయి. ప్రపంచ చమురు రవాణాలో అత్యంత కీలకమైన ఈ మార్గంపై ఇరాన్కు ఉన్న వ్యూహాత్మక ప్రాధాన్యత కారణంగా అక్కడ చోటుచేసుకునే ఏ చిన్న పరిణామమైనా అంతర్జాతీయ ఇంధన మార్కెట్లపై ప్రభావం చూపే అవకాశం ఉంది. అమెరికా ఈ ప్రాంతంలో నావిగేషన్, వాణిజ్య రవాణాకు సంబంధించిన భద్రతను ప్రస్తావిస్తుండగా, ఇరాన్ మాత్రం ఈ ప్రాంతంలో తన నియంత్రణ, భద్రతా ప్రయోజనాలను కాపాడుకుంటామని చెబుతోంది.
ఇదే సమయంలో ఇరాన్ తీవ్ర ఆర్థిక ఒత్తిడిని కూడా ఎదుర్కొంటోంది. అమెరికా విధిస్తున్న ఆంక్షలు, యుద్ధ పరిస్థితులు దేశ ఆర్థిక వ్యవస్థపై తీవ్ర ప్రభావం చూపుతున్నాయి. ఇరాన్ అధ్యక్షుడు మసూద్ పెజెష్కియాన్ ప్రకారం విదేశీ వాణిజ్యం గణనీయంగా పడిపోయింది. ద్రవ్యోల్బణం కూడా తీవ్ర స్థాయిలో ఉన్నట్లు తాజా నివేదికలు చెబుతున్నాయి. ఈ పరిస్థితుల్లో ఆర్థిక స్థిరత్వం, ద్రవ్యోల్బణం నియంత్రణ, ఉపాధి వంటి అంశాలపై ప్రభుత్వం దృష్టి పెట్టాలని ముజ్తబా ఖమేనీ గతంలో కూడా సూచించారు.
ముజ్తబా ఖమేనీ తాజా సందేశానికి మరో ప్రత్యేకత ఆయన చాలా కాలంగా బహిరంగంగా కనిపించకపోవడం. ఫిబ్రవరి 28న అమెరికా, ఇజ్రాయెల్ దాడుల్లో అప్పటి ఇరాన్ సుప్రీం లీడర్ అయతొల్లా అలీ ఖమేనీ మరణించగా, ఆయన కుమారుడు ముజ్తబా ఖమేనీ కూడా ఆ దాడిలో గాయపడినట్లు వివిధ నివేదికలు పేర్కొన్నాయి. అనంతరం ఆయన ఇరాన్ సుప్రీం లీడర్గా బాధ్యతలు స్వీకరించారు. అయితే ఆ తర్వాత ఆయన బహిరంగ కార్యక్రమాల్లో కనిపించకపోవడంతో ఆయన ఆరోగ్య పరిస్థితి, భద్రతపై అనేక ఊహాగానాలు మొదలయ్యాయి.
