రైతులకు అర్థవంతమైన సాగునీటి ప్రయోజనాలను అందించడంలో విఫలమవుతూ, భారీగా ప్రజా ధనాన్ని వృధా చేసిందని ఆరోపిస్తూ, సాగునీటి, పౌర సరఫరాల శాఖ మంత్రి ఎన్. ఉత్తమ్ కుమార్ రెడ్డి గత బీఆర్ఎస్ ప్రభుత్వంపై తీవ్ర స్థాయిలో విమర్శలు చేశారు.
శుక్రవారం నాడు పాలమూరు ప్రాంతంలో సాగునీటి ప్రాజెక్టులలో రెండు రోజుల పాటు విస్తృతంగా పర్యటించిన అనంతరం విలేకరుల సమావేశంలో ఉత్తమ్ కుమార్ రెడ్డి మాట్లాడుతూ, కొనసాగుతున్న ప్రతిపాదిత సాగునీటి ప్రాజెక్టులన్నింటినీ వేగవంతం చేయడం, వాటిని పూర్తి చేయడానికి ఏళ్ల తరబడి ఆలస్యం చేస్తున్న అడ్డంకులను తొలగించాలానే స్పష్టమైన లక్ష్యంతో కాంగ్రెస్ ప్రభుత్వం ఈ పర్యటన చేపట్టిందని అన్నారు.
పాలమూరు-రంగారెడ్డి ఎత్తిపోతల పథకానికి నీటి వనరును జూరాల నుండి శ్రీశైలానికి మార్చడమే గత ప్రభుత్వం చేసిన అతిపెద్ద తప్పులలో ఒకటని ఆయన ఆరోపించారు. ఈ నిర్ణయం ఉమ్మడి మహబూబ్నగర్ జిల్లా ప్రయోజనాలను తీవ్రంగా దెబ్బతీసిందని, ఒక్క ఎకరం హామీతో కూడిన ఆయకట్టును కూడా సృష్టించకుండా భారీ వ్యయానికి దారితీసిందని ఆయన అన్నారు.
“పాలమూరు-రంగారెడ్డి ప్రాజెక్టుపై దాదాపు రూ. 27,000 కోట్లు ఖర్చు చేశామని గత ప్రభుత్వం చెబుతోంది, కానీ ఒక్క ఎకరం సాగునీటి సామర్థ్యాన్ని కూడా సృష్టించలేదు. వారి ప్రచారం వెనుక ఉన్న వాస్తవం ఇదే,” అని ఆయన అన్నారు. దశాబ్ద కాలంగా బీఆర్ఎస్ పాలన ఉన్నప్పటికీ తెలంగాణలో అనేక ప్రధాన సాగునీటి పథకాలు అసంపూర్తిగా మిగిలిపోయాయని మంత్రి అన్నారు.
పదేళ్ల బీఆర్ఎస్ పాలనలో కంటే, 2023 డిసెంబర్లో కాంగ్రెస్ ప్రభుత్వం అధికారంలోకి వచ్చిన తర్వాత తెలంగాణ ఎక్కువ కృష్ణా నదీ జలాలను వినియోగించుకుందని ఆయన పేర్కొన్నారు. ఈ పెరిగిన వినియోగం వల్ల మహబూబ్నగర్, నల్గొండ, ఖమ్మం జిల్లాలలోని కొన్ని ప్రాంతాలతో సహా కృష్ణా జలాలపై ఆధారపడిన జిల్లాల్లో అధిక వ్యవసాయ విస్తీర్ణం, రికార్డు స్థాయిలో వరి ఉత్పత్తి, అపూర్వమైన స్థాయిలో కొనుగోళ్లు జరిగాయని ఆయన అన్నారు.
“తెలంగాణ ఇప్పటికే దేశంలోనే నంబర్ వన్ వరి ఉత్పత్తి చేసే రాష్ట్రంగా ఉందని ఈ రోజు, మనం భారత దేశంలో నంబర్ వన్ ఉత్పత్తిదారుగా మాత్రమే కాకుండా, నంబర్ వన్ సేకరణ రాష్ట్రంగా కూడా ఉన్నాము,” అని ఆయన అన్నారు.
కేంద్రం నుండి పరిమిత మద్దతు ఉన్నప్పటికీ, రాష్ట్ర ప్రభుత్వం రైతులకు గట్టిగా అండగా నిలుస్తూనే ఉందని మంత్రి పేర్కొన్నారు. కేంద్రం కేవలం 51 లక్షల మెట్రిక్ టన్నుల వరిని సేకరించడానికి అంగీకరించగా, రైతులు పండించిన ప్రతి ధాన్యాన్ని సేకరించేందుకు తెలంగాణ అదనంగా రూ. 6,600 కోట్లు ఖర్చు చేస్తోందని ఆయన తెలిపారు. మొత్తం సేకరణ 75 లక్షల మెట్రిక్ టన్నులు దాటుతుందని అంచనా వేయబడింది.
సాగునీటి రంగం విషయానికి వస్తే, ఉమ్మడి మహబూబ్నగర్ జిల్లాలోని అన్ని ప్రధాన ప్రాజెక్టులను పూర్తి చేయడానికి ఒక సమగ్ర కార్యాచరణ ప్రణాళికను సిద్ధం చేయడమే ఈ రెండు రోజుల పర్యటన ఉద్దేశ్యమని ఉత్తమ్ కుమార్ రెడ్డి అన్నారు. పాలమూరు- రంగారెడ్డి ఎత్తిపోతల పథకం, నారాయణపేట-కొడంగల్ ఎత్తిపోతల పథకం, కల్వకుర్తి, నెట్టెంపాడు, భీమా కోయిల్సాగర్ ప్రాజెక్టులపై సవివరమైన సమీక్షలు నిర్వహించారు. తమ ప్రభుత్వ హయాంలో సాగునీటి పథకాలను పూర్తి చేస్తామని మంత్రి పాలమూరు ప్రజలకు హామీ ఇచ్చారు.
పూర్వపు మహబూబ్నగర్ జిల్లాలో పెండింగ్లో ఉన్న భూసేకరణ, పునరావాసం పునఃస్థాపన సమస్యలతో పాటు, అటవీ అనుమతుల అవసరాలన్నింటినీ రాబోయే ఆరు నెలల్లో పరిష్కరిస్తామని ఉత్తమ్ కుమార్ రెడ్డి తెలిపారు. రైతులకు ఇది స్పష్టమైన హామీ అని అభివర్ణిస్తూ, జిల్లా చరిత్రలో మునుపెన్నడూ చూడని స్థాయిలో సాగునీటి విస్తరణ జరుగుతుందని మంత్రి ప్రకటించారు.
“మా హయాంలో లక్షల ఎకరాల్లో కొత్త ఆయకట్టును ఏర్పాటు చేస్తాం. పాలమూరు ప్రజలు, రైతులు నీటి పారుదల రంగంలో చారిత్రాత్మక మార్పు ను చూడబోతున్నారు. గతంలో ఇచ్చిన హామీలకు, ఇప్పుడు వాస్తవంగా నెరవేర్చబోయే ఫలితాలకు మధ్య ఉన్న తేడా క్షేత్రస్థాయిలో స్పష్టంగా కనిపిస్తుంది,” అని ఆయన అన్నారు. నీటి పారుదల అభివృద్ధిని వేగవంతం చేయడానికి, కృష్ణా జలాల వినియోగాన్ని గరిష్ఠ స్థాయికి పెంచడానికి, పాలమూరు ప్రాంత రైతులకు దీర్ఘకాలిక నీటి భద్రతను కల్పించడానికి కాంగ్రెస్ ప్రభుత్వం పూర్తి నిబద్ధతతో ఉందని ఆయన పేర్కొన్నారు.
