దేశవ్యాప్తంగా కోట్లాది కుటుంబాలు వినియోగిస్తున్న ఎల్పీజీ గ్యాస్ సబ్సిడీ విషయంలో కేంద్ర ప్రభుత్వం కీలక నిర్ణయం తీసుకుంది. సంవత్సరానికి రూ.10 లక్షల కంటే ఎక్కువ ఆదాయం ఉన్న కుటుంబాలకు ఎల్పీజీ సబ్సిడీ నిలిపివేస్తున్నట్లు స్పష్టం చేసింది. ఇప్పటి వరకు కేవలం వినియోగదారులు ఇచ్చిన డిక్లరేషన్ ఆధారంగానే సబ్సిడీ కొనసాగుతుండగా, ఇకపై నేరుగా పాన్ కార్డ్, ఆదాయపు పన్ను (IT) రికార్డుల ఆధారంగా అర్హతను పరిశీలించనుంది. దీంతో దేశవ్యాప్తంగా లక్షలాది కుటుంబాలపై ప్రభావం పడే అవకాశం కనిపిస్తోంది.
వాస్తవానికి ఈ నిబంధన కొత్తది కాదు. 2015లోనే కేంద్ర ప్రభుత్వం “Give It Up” కార్యక్రమంతో అధిక ఆదాయం కలిగిన కుటుంబాలు స్వచ్ఛందంగా సబ్సిడీ వదులుకోవాలని పిలుపునిచ్చింది. అదే సమయంలో వార్షిక ఆదాయం రూ.10 లక్షలు దాటిన వారు సబ్సిడీకి అర్హులు కాదనే నిబంధనను కూడా అమల్లోకి తీసుకొచ్చింది. అయితే ఆ సమయంలో ఈ నిబంధన అమలు పూర్తిగా కఠినంగా జరగలేదు. వినియోగదారులు ఇచ్చే వివరాలపై ఆధారపడటం వల్ల చాలామంది సబ్సిడీని కొనసాగిస్తూ వచ్చారు.
ఇప్పుడు కేంద్ర ప్రభుత్వం ఈ వ్యవస్థను మరింత కట్టుదిట్టం చేసింది. ఆయిల్ మార్కెటింగ్ కంపెనీలు వినియోగదారుల పాన్ కార్డ్ వివరాలను ఆదాయపు పన్ను శాఖ రికార్డులతో సరిపోల్చి పరిశీలిస్తున్నాయి. ఇందులో కుటుంబ వార్షిక ఆదాయం రూ.10 లక్షలు దాటినట్లు తేలితే, ఆ కుటుంబానికి సబ్సిడీ నిలిపివేయబడుతోంది. ముఖ్యంగా గమనించాల్సిన విషయం ఏమిటంటే, కేవలం గ్యాస్ కనెక్షన్ ఎవరి పేరుపై ఉందో వారి ఆదాయం మాత్రమే కాకుండా, భార్యాభర్తల్లో ఎవరి ఆదాయం అయినా కలిపి రూ.10 లక్షలు దాటితే ఆ కుటుంబం సబ్సిడీకి అనర్హంగా పరిగణించబడుతుంది.
ఉదాహరణకు భర్త ఆదాయం రూ.6 లక్షలు, భార్య ఆదాయం రూ.5 లక్షలు ఉంటే మొత్తం కుటుంబ ఆదాయం రూ.11 లక్షలు అవుతుంది. అలాంటి కుటుంబానికి ఇకపై సబ్సిడీ వర్తించదు. ఈ అంశం చాలా మందికి తెలియకపోవడంతో ప్రస్తుతం భారీగా సందిగ్ధ పరిస్థితులు నెలకొంటున్నాయి.
ఇప్పటికే అనర్హులుగా గుర్తించిన వినియోగదారులకు ఆయిల్ కంపెనీలు మొబైల్ మెసేజ్లు పంపుతున్నాయి. “మీ ఆదాయపు పన్ను రికార్డుల ప్రకారం మీరు LPG సబ్సిడీకి అర్హులు కారు” అని సందేశాలు వస్తున్నాయి. ఈ మెసేజ్ అందుకున్న వారు 7 రోజుల్లోగా అభ్యంతరాలు లేదా సరైన వివరాలు సమర్పించాల్సి ఉంటుంది. నిర్ణీత గడువులో స్పందించకపోతే ఆటోమేటిక్గా వారి గ్యాస్ సబ్సిడీ నిలిపివేయబడుతుంది.
ఈ చర్య ద్వారా కేంద్ర ప్రభుత్వం సబ్సిడీలను నిజంగా అర్హులైన పేద మరియు మధ్యతరగతి కుటుంబాలకు మాత్రమే పరిమితం చేయాలని చూస్తోంది. ప్రభుత్వ అంచనాల ప్రకారం అధిక ఆదాయం ఉన్నవారు కూడా ఇప్పటి వరకు సబ్సిడీ పొందడం వల్ల ప్రతి సంవత్సరం వేల కోట్ల రూపాయల భారం ప్రభుత్వంపై పడుతోంది. ఈ నేపథ్యంలో డేటా ఆధారిత తనిఖీలతో అనర్హులను గుర్తించి సబ్సిడీ వ్యవస్థను పారదర్శకంగా మార్చాలని లక్ష్యంగా పెట్టుకుంది.
మరోవైపు, ఈ నిర్ణయంపై మిశ్రమ స్పందనలు వ్యక్తమవుతున్నాయి. కొందరు నిజంగా అర్హులైన వారికి మాత్రమే ప్రయోజనం అందడం మంచిదని అభిప్రాయపడుతుండగా, మరికొందరు మధ్యతరగతి కుటుంబాలపై అదనపు భారం పడుతుందని అంటున్నారు. ప్రస్తుతం గ్యాస్ సిలిండర్ ధరలు ఇప్పటికే అధికంగా ఉండటంతో సబ్సిడీ తొలగితే నెలవారీ ఖర్చులు మరింత పెరుగుతాయని వినియోగదారులు ఆందోళన వ్యక్తం చేస్తున్నారు.
