ఆంధ్రప్రదేశ్లో అత్యంత ప్రతిష్ఠాత్మకంగా తలపెట్టిన ‘స్పేస్ సిటీ’ ప్రాజెక్టు వేగంగా ముందుకు సాగుతోందని రాష్ట్ర ఐటీ, మానవ వనరుల శాఖ మంత్రి నారా లోకేష్ తెలిపారు. రాష్ట్రాన్ని సాంకేతిక, ఆవిష్కరణల కేంద్రంగా తీర్చిదిద్దే లక్ష్యంతో రూపొందించిన ఈ ప్రాజెక్టు ఇప్పుడు కార్యరూపం దాల్చుతోందని ఆయన వెల్లడించారు.
ఈ మేరకు లోకేశ్ సోషల్ మీడియా వేదిక Xలో చేసిన పోస్టులో కీలక వివరాలను పంచుకున్నారు. ‘స్పేస్ సిటీ’ నిర్మాణం గురించి మొదట ప్రకటించినప్పుడు చాలా మంది సందేహాలు వ్యక్తం చేశారని, అయితే ఇప్పుడు ఆ కల నిజమవుతోందని ఆయన పేర్కొన్నారు. ప్రభుత్వం తీసుకున్న దిశా నిర్దేశం, ప్రణాళికలు ఇప్పుడు ఫలితాలు ఇవ్వడం ప్రారంభించాయని ఆయన స్పష్టం చేశారు.
ఈ ప్రాజెక్టులో భాగంగా ప్రముఖ అంతరిక్ష సాంకేతిక సంస్థ అస్ట్రోబెస్ ఆంధ్రప్రదేశ్లో భారీ పెట్టుబడులు పెట్టనుంది. దేశంలోనే తొలిసారిగా ప్రైవేటు రంగంలో 200 టన్నుల థ్రస్ట్ సామర్థ్యం గల క్రయోజెనిక్ ఇంజిన్ టెస్ట్ ఫెసిలిటీని ఏర్పాటు చేయనున్నట్లు లోకేశ్ వెల్లడించారు. ఇది భారత అంతరిక్ష రంగంలో ఒక ముఖ్యమైన మైలురాయిగా భావిస్తున్నారు.
క్రయోజెనిక్ ఇంజిన్లు రాకెట్ ప్రయోగాల్లో కీలక పాత్ర పోషిస్తాయి. ఈ టెస్ట్ ఫెసిలిటీ ఏర్పాటుతో భారతదేశంలోనే అత్యాధునిక సాంకేతికత అభివృద్ధి చెందే అవకాశముందన్నారు. ఇప్పటివరకు ఇలాంటి సదుపాయాలు ప్రధానంగా ప్రభుత్వ రంగ సంస్థలకే పరిమితమై ఉండగా, ఇప్పుడు ప్రైవేట్ రంగంలో కూడా విస్తరించడం అంతరిక్ష రంగ అభివృద్ధికి దోహదపడుతుందన్నారు.
‘స్పేస్ సిటీ’ ప్రాజెక్టు ద్వారా రాష్ట్రంలో పెట్టుబడులు పెరగడమే కాకుండా, భారీ స్థాయిలో ఉద్యోగావకాశాలు కూడా సృష్టించబడే అవకాశముంది. అంతేకాకుండా, పరిశోధన, అభివృద్ధి రంగాల్లో యువతకు కొత్త అవకాశాలు లభిస్తాయని ప్రభుత్వం ఆశిస్తోంది. స్టార్టప్లకు ప్రోత్సాహం, టెక్నాలజీ అభివృద్ధికి అనుకూల వాతావరణం కల్పించడం ఈ ప్రాజెక్టు ముఖ్య లక్ష్యాలలో ఒకటిగా పేర్కొంటున్నారు.
లోకేశ్ తన పోస్టులో “ఆంధ్రప్రదేశ్ ఇప్పుడు అత్యాధునిక ఆవిష్కరణలకు చిరునామాగా మారుతోంది. భవిష్యత్తు ఎంతో ఉత్సాహంగా ఉంది” అని పేర్కొన్నారు. ఈ వ్యాఖ్యలు రాష్ట్రంలో టెక్నాలజీ రంగంపై ప్రభుత్వ దృష్టిని స్పష్టంగా తెలియజేస్తున్నాయి.
ఈ ప్రాజెక్టు విజయవంతమైతే ఆంధ్రప్రదేశ్ దేశంలోనే కాకుండా అంతర్జాతీయ స్థాయిలో కూడా అంతరిక్ష పరిశ్రమలో ఒక కీలక కేంద్రంగా మారే అవకాశం ఉంది. విదేశీ పెట్టుబడులను ఆకర్షించడంలో కూడా ఇది సహాయకారిగా నిలవవచ్చని నిపుణుల భావిస్తున్నారు.
