ఆంధ్రప్రదేశ్లో ప్రభుత్వ ఉద్యోగాల నియామక వ్యవస్థలో కీలక మార్పులు చోటుచేసుకున్నాయి. రాష్ట్ర ప్రభుత్వం ఉద్యోగుల స్థానిక కేడర్లు, నియామకాలపై కొత్త నిబంధనలను అమల్లోకి తీసుకువచ్చింది. 1975 నాటి పాత విధానాన్ని రద్దు చేస్తూ, “ఆంధ్రప్రదేశ్ పబ్లిక్ ఎంప్లాయ్మెంట్ ఆర్డర్, 2025” పేరుతో జారీ అయిన రాష్ట్రపతి ఉత్తర్వులను ప్రభుత్వం అధికారికంగా అమలు చేయడం జరిగింది. ఈ మేరకు సాధారణ పరిపాలన శాఖ (GAD) ఉత్తర్వులు జారీ చేసింది.
రాష్ట్రంలో ఇటీవల అమలులోకి వచ్చిన 26 జిల్లాల పరిపాలనా నిర్మాణానికి అనుగుణంగా ఉద్యోగ వ్యవస్థను పునర్వ్యవస్థీకరించాల్సిన అవసరం ఉన్నందున ఈ నిర్ణయం తీసుకున్నట్లు ప్రభుత్వం వెల్లడించింది. కొత్త జిల్లాల ఏర్పాటుతో పరిపాలన వికేంద్రీకరణ జరిగిందని, దీనికి అనుగుణంగా ఉద్యోగాల కేటాయింపులో కూడా మార్పులు అవసరమయ్యాయని అధికారులు తెలిపారు.
ఈ కొత్త ఉత్తర్వుల ప్రకారం, ప్రభుత్వ ఉద్యోగాల డైరెక్ట్ రిక్రూట్మెంట్లో 95 శాతం పోస్టులను స్థానిక అభ్యర్థులకు రిజర్వ్ చేయనున్నారు. జిల్లా, జోనల్, మల్టీ-జోనల్ కేడర్ పోస్టులన్నింటికీ ఈ నిబంధన వర్తించనుంది. స్థానిక అభ్యర్థులకు అధిక ప్రాధాన్యం ఇవ్వడం ద్వారా ప్రాంతీయ సమతుల్యత సాధించడం, స్థానిక యువతకు ఉపాధి అవకాశాలను పెంచడం ఈ నిర్ణయానికి ముఖ్య ఉద్దేశ్యంగా ప్రభుత్వం పేర్కొంది.
అదేవిధంగా “స్థానిక అభ్యర్థి” నిర్వచనంపై కూడా ప్రభుత్వం స్పష్టత ఇచ్చింది. అభ్యర్థి సంబంధిత అర్హత పరీక్షకు హాజరైన విద్యా సంవత్సరంతో ముగిసేలా, వరుసగా నాలుగు విద్యా సంవత్సరాలు ఆయా స్థానిక ప్రాంతంలోని విద్యాసంస్థలో చదివి ఉండాలి. అలా చదివిన వారినే స్థానికులుగా పరిగణించనున్నారు. ఈ నిబంధన ద్వారా నిజమైన స్థానికులకు అవకాశాలు కల్పించాలనే లక్ష్యాన్ని ప్రభుత్వం స్పష్టం చేసింది.
కొత్త విధానంలో ఉద్యోగాలను జిల్లా స్థాయి, జోనల్ స్థాయి, మల్టీ-జోనల్ స్థాయిలుగా విభజించి, వాటికి అనుగుణంగా నియామక ప్రక్రియను అమలు చేయనున్నారు. దీని వల్ల పరిపాలనా వ్యవస్థ మరింత పారదర్శకంగా, సమర్థవంతంగా మారుతుందని అధికారులు భావిస్తున్నారు. అలాగే ఉద్యోగ నియామకాల్లో ప్రాంతీయ అసమానతలను తగ్గించడంలో ఈ విధానం ఉపయోగపడుతుందని పేర్కొంటున్నారు.
ఈ కొత్త విధానంపై కొన్ని చర్చలు కూడా కొనసాగుతున్నాయి. స్థానికులకు అధిక ప్రాధాన్యం ఇవ్వడం వల్ల ఇతర ప్రాంతాల అభ్యర్థులకు అవకాశాలు తగ్గే ప్రమాదంతో కొంత ఆవేదన వ్యక్తమవుతుంది. మరోవైపు, స్థానిక యువతకు ఉపాధి అవకాశాలు పెరగడం ద్వారా ప్రాంతీయ అభివృద్ధికి ఇది దోహదపడుతుందని భావిస్తున్నారు.
