యువత ఉద్యోగులుగానే కాకుండా పారిశ్రామికవేత్తలుగా ఎదిగి, మరింత మంది నిరుద్యోగులకు ఉపాధి కల్పించాలంటూ రాష్ట్ర బీసీ, ఈడబ్ల్యూఎస్ సంక్షేమ, చేనేత జౌళి శాఖ మంత్రి ఎస్ సవిత పిలుపునిచ్చారు. రాష్ట్ర అభివృద్ధిలో యువత కీలక పాత్ర పోషించాలని ఆమె పేర్కొన్నారు.
ఈ సందర్భంగా ఆమె మాట్లాడుతూ, ప్రతి ఇంటి ఒకరు పారిశ్రామికవేత్తగా ఎదగాలనేదే ముఖ్యమంత్రి చంద్రబాబు లక్ష్యమని మంత్రి తెలిపారు. ఈ లక్ష్య సాధనలో భాగంగా ప్రభుత్వం పలు ప్రోత్సాహక పథకాలను అమలు చేస్తోందని ఆమె వెల్లడించారు.
అచార్య నాగార్జున యునివర్సిటీ పరిధిలోని డాక్టర్ హెచ్.హెచ్. డైక్మన్ ఆడిటోరియంలో బుధవారం నిర్వహించిన ఎంఎస్ఎంఈ పార్కుల్లో ఈడబ్ల్యూఎస్ వర్గాలకు అవకాశాలపై ఒకరోజు అవగాహన సదస్సులో మంత్రి సవిత పాల్గొన్నారు. కార్యక్రమాన్ని జ్యోతి ప్రజ్వలనతో ప్రారంభించిన అనంతరం ఆమె ప్రసంగించారు.
ఈ సందర్భంగా మంత్రి మాట్లాడుతూ, చిన్న, మధ్య తరహా పరిశ్రమల అభివృద్ధికి ఎంఎస్ఎంఈ పార్కులు ఎంతో ఉపయోగకరమన్నారు. ముఖ్యంగా అగ్ర కులాల్లో ఆర్థికంగా వెనుకబడిన వర్గాలకు చెందిన ఈడబ్ల్యూఎస్ వర్గీయులకు ఈ పార్కులు మంచి అవకాశాలను అందిస్తాయని పేర్కొన్నారు. ఈ వర్గాలకు అవగాహన కల్పించేందుకు ఇలాంటి సదస్సులు నిర్వహించడం అభినందనీయమని తెలిపారు.
ప్రభుత్వం ఇప్పటికే ప్రకృతి వ్యవసాయం ద్వారా ఆదాయం ఎలా పెంచుకోవచ్చో వివరించే కార్యక్రమాలు నిర్వహించిందని, ఇప్పుడు ఉపాధి కల్పనపై దృష్టి సారిస్తూ మరో అవగాహన సదస్సు నిర్వహించడం సానుకూల పరిణామమని మంత్రి అభిప్రాయపడ్డారు. ఇది ప్రభుత్వ దృఢ సంకల్పానికి నిదర్శనమని పేర్కొన్నారు.
ఈడబ్ల్యూఎస్ వర్గీయుల పేదరికాన్ని తొలగించి, వారికి ఆర్థికంగా బలమైన స్థితి కల్పించడమే కూటమి ప్రభుత్వ లక్ష్యమని మంత్రి స్పష్టం చేశారు. పరిశ్రమలు స్థాపించాలనుకునే ఔత్సాహికులకు భూమి, రుణాలు, సబ్సిడీలు వంటి అన్ని విధాలా సహకారం అందించేందుకు ప్రభుత్వం సిద్ధంగా ఉందన్నారు.
యువత స్వయం ఉపాధి వైపు దృష్టి సారిస్తే రాష్ట్ర ఆర్థిక వ్యవస్థ బలోపేతం అవుతుందని, కొత్త ఉద్యోగ అవకాశాలు సృష్టించబడతాయని మంత్రి వివరించారు. ఈ దిశగా ప్రభుత్వం చేపడుతున్న చర్యలను యువత వినియోగించుకోవాలని సూచించారు. ఈ కార్యక్రమంలో ఎంఎస్ఎంఈ సీఈవో ఎం.విశ్వ, వీసీ గంగాధర్ రావు, పలువురు కార్పొరేషన్ చైర్మన్లు బుచ్చి రాంప్రసాద్, బ్రహ్మం చౌదరి, డైరెక్టర్లు, ఔత్సాహిక పారిశ్రామికవేత్తలు, విద్యార్థులు, ఈడబ్ల్యూఎస్ సామాజిక వర్గీయులు తదితరులు పాల్గొన్నారు.
