తెలంగాణలో ప్రత్యేక ఓటర్ల జాబితా సవరణ (సర్)–2026 ప్రక్రియలో భాగంగా ముసాయిదా ఓటర్ల జాబితాను రాష్ట్ర ప్రధాన ఎన్నికల అధికారి సి. సుదర్శన్ రెడ్డి సోమవారం విడుదల చేశారు. రాష్ట్రవ్యాప్తంగా ఇంటింటి సర్వే ద్వారా సేకరించిన వివరాలను పరిశీలించిన అనంతరం ముసాయిదా జాబితాను రూపొందించినట్లు అధికారులు తెలిపారు. ఓటర్ల జాబితాలో తమ పేరు ఉందో లేదో ప్రతి ఒక్కరూ పరిశీలించుకోవాలని, పేరు గల్లంతైనట్లు గుర్తిస్తే నిర్దేశిత విధానంలో దరఖాస్తు చేసుకోవాలని ఎన్నికల అధికారులు సూచించారు. ముసాయిదా జాబితాలో పేరు లేని అర్హులైన పౌరులు ఫారం-6 ద్వారా కొత్తగా ఓటరుగా నమోదు చేసుకోవచ్చని సి. సుదర్శన్ రెడ్డి స్పష్టం చేశారు. అదే విధంగా గతంలో ఓటరుగా ఉన్నప్పటికీ వివిధ కారణాలతో ముసాయిదా జాబితాలో పేరు కనిపించని వారు కూడా తమ అర్హతకు సంబంధించిన వివరాలు సమర్పించి ఓటరు జాబితాలో పేరును చేర్చుకునేందుకు అవకాశం ఉంటుందని అధికారులు వెల్లడించారు.
రాష్ట్రవ్యాప్తంగా నిర్వహించిన ఎన్యూమరేషన్ ప్రక్రియలో సుమారు 2 కోట్ల ఎన్యూమరేషన్ ఫారాలు అందినట్లు అధికారులు తెలిపారు. ఇది రాష్ట్రంలోని మొత్తం ఓటర్లలో సుమారు 78.30 శాతం అని పేర్కొన్నారు. ఇంటింటి సర్వేలో భాగంగా బూత్ స్థాయి అధికారులు ఓటర్ల వివరాలను సేకరించారు. ఓటర్లు ప్రస్తుతం నివసిస్తున్నారా? చిరునామా మారిందా? మరణించారా? ఒకటి కంటే ఎక్కువ ప్రాంతాల్లో ఓటు ఉందా? వంటి అంశాలను పరిశీలించారు.ఈ సర్వేలో గైర్హాజరు, చిరునామా మార్పు, మరణం, డూప్లికేట్ ఓటు వంటి అంశాలకు సంబంధించిన వివరాలు ప్రత్యేకంగా గుర్తించారు. వీరిని ఏఎస్డీడీ (Absent, Shifted, Dead, Duplicate) కేటగిరీ కింద చేర్చారు. రాష్ట్రవ్యాప్తంగా ఈ కేటగిరీలో మొత్తం 73,39,235 మంది ఉన్నట్లు అధికారులు గుర్తించారు. ఇంటింటి సర్వే సమయంలో బూత్ స్థాయి అధికారులు సేకరించిన సమాచారం ఆధారంగా ఈ వివరాలను నమోదు చేసినట్లు తెలిపారు.
అయితే ఏఎస్డీడీ జాబితాలో పేరు ఉన్న ప్రతి వ్యక్తి ఓటు హక్కును కోల్పోయినట్లుగా భావించాల్సిన అవసరం లేదని స్పష్టమవుతోంది. వాస్తవంగా తాను అదే చిరునామాలో నివసిస్తున్నట్లు, ఓటు హక్కుకు అర్హుడినని నిరూపించగలిగే వారు నిర్దేశిత ప్రక్రియ ద్వారా తమ పేరును తిరిగి జాబితాలో చేర్చుకునే అవకాశం ఉంటుంది. అందువల్ల ముసాయిదా జాబితాలో తమ పేరు కనిపించకపోయినా అర్హులైన ఓటర్లు ఆందోళన చెందకుండా ఎన్నికల అధికారులను సంప్రదించాలని సూచించారు.ముఖ్యంగా శాశ్వతంగా చిరునామా మార్చుకున్న వారు, ఇంటి వద్ద అందుబాటులో లేని వారు, మరణించిన వ్యక్తులు, ఒకటి కంటే ఎక్కువ ప్రాంతాల్లో ఓటు హక్కు కలిగి ఉన్నవారిని గుర్తించడం ఈ ప్రత్యేక సవరణలో ప్రధాన ఉద్దేశంగా అధికారులు పేర్కొన్నారు. ఓటర్ల జాబితాలో అనర్హుల పేర్లు ఉండకుండా, అర్హులైన ప్రతి ఒక్కరి పేరు నమోదు చేయడమే లక్ష్యంగా సవరణ ప్రక్రియ కొనసాగుతోంది.
ముసాయిదా జాబితాలో పేరు లేని అర్హులైన వ్యక్తులు ఫారం-6 ద్వారా దరఖాస్తు చేసుకోవాలి. దరఖాస్తు సమయంలో వయసు, గుర్తింపును నిర్ధారించే అవసరమైన ధ్రువీకరణ పత్రాలను జత చేయాలి. దరఖాస్తులో ఓటరు పూర్తి పేరు, పుట్టిన తేదీ, పాస్పోర్ట్ సైజ్ ఫొటో, కుటుంబ సభ్యుల్లో ఒకరి వివరాలు, పూర్తి నివాస చిరునామా వంటి సమాచారాన్ని నమోదు చేయాల్సి ఉంటుంది. గతంలో ఓటర్ ఐడీ నంబర్ ఉంటే దానిని కూడా దరఖాస్తులో పేర్కొనాలని అధికారులు సూచించారు.ఓటర్ల జాబితా సవరణలో భాగంగా ప్రతి అర్హుడి పేరు నమోదు కావడం అత్యంత కీలకం. ఓటు హక్కు ప్రజాస్వామ్యంలో అత్యంత ముఖ్యమైన హక్కుల్లో ఒకటి కావడంతో అర్హత ఉన్న ప్రతి పౌరుడు తన పేరు ఓటర్ల జాబితాలో ఉందో లేదో నిర్ధారించుకోవాల్సిన అవసరం ఉంది. ముఖ్యంగా ఇటీవల నివాసం మార్చుకున్నవారు, 18 సంవత్సరాల వయసు పూర్తి చేసుకున్న యువత, వివాహం లేదా ఇతర కారణాలతో చిరునామా మార్చుకున్నవారు తమ వివరాలను తప్పనిసరిగా పరిశీలించుకోవాలని అధికారులు సూచిస్తున్నారు.
అదేవిధంగా ఒకే వ్యక్తికి వేర్వేరు ప్రాంతాల్లో ఓటు ఉండటం వంటి సమస్యలను కూడా సవరణ ప్రక్రియ ద్వారా పరిష్కరించే ప్రయత్నం చేస్తున్నారు. డూప్లికేట్ ఓట్లను గుర్తించడం ద్వారా ఓటర్ల జాబితాను మరింత పారదర్శకంగా, ఖచ్చితంగా రూపొందించేందుకు ఎన్నికల యంత్రాంగం చర్యలు చేపడుతోంది. ముసాయిదా జాబితా విడుదల అనంతరం అభ్యంతరాలు, దరఖాస్తులను పరిశీలించి తుది ఓటర్ల జాబితాను రూపొందించే ప్రక్రియ కొనసాగనుంది. ఈ నేపథ్యంలో ఓటర్లు నిర్లక్ష్యం చేయకుండా తమ పేరు, చిరునామా, ఇతర వివరాలను సరిచూసుకోవాలని అధికారులు సూచిస్తున్నారు. పేరులో తప్పులు, చిరునామాలో మార్పులు లేదా ఇతర వివరాల్లో పొరపాట్లు ఉన్నట్లయితే వాటిని సరిచేసుకునేందుకు ఎన్నికల నిబంధనల ప్రకారం దరఖాస్తు చేసుకోవాల్సి ఉంటుంది.
